މާލޭގެ ކާނިވަލް ސަރަހައްދުގައި އައު ސްޓޭޖެއް އަޅައިދޭނެ ބަޔަކު ހޯދުމަށް މާލޭ ސިޓީ ކައުންސިލުން އިއުލާންކޮށްފިއެވެ.

އެ ކައުންސިލުން ކޮށްފައިވާ އިއުލަނުގައި ވަނީ އެ ސްޓޭޖު ތަޅާލުމަށްފަހު، އަމިއްލަ ތަކެތީގައި އައު ސްޓޭޖެއް ހަދައިދޭނެ ބަޔަކު ބޭނުންވާ ކަމަށެވެ.

އަލަށް ހަދާ ސްޓޭޖުގައި ކުރަންޖެހެޭ މަސައްކަތުގެ ތެރޭގައި ސްޓޭޖު ތަޅާލައި ކުނިތައް އުކާލުމާއި އައު ސްޓޭޖުގެ ސްޓްރަކްޗަރ ހެދުމާއި އެކަމަށް ބޭނުންވާ ކޮންސެޕްޓާއި އިންޖިނިއަރިންގ އާއި ކުރެހުންތައް ތައްޔާރުކުރުން ހިމެނެއެވެ. އަދި ހުއްދަ ހޯދުމާއި ހުރިހާ ފިނިޝިންގ މަސައްކަތް ކުރުމާއި އަލަށް ހަދާ ސްޓޭޖުގެ ކަރަންޓާއި ފެނުގެ މަސައްކަތް ކުރުން ވެސް ހިމެނެއެވެ.

ސިޓީ ކައުންސިލުން ވަނީ އެކަމަށް ޝައުގުވެރިވާ ފަރާތްތަކަށް ބާއްވާ މައުލޫމާތު ސާފުކުރުމުގެ ބައްދަލުވުން އޮންނާނީ މި މަހުގެ 11 ވާ ބުދަ ދުވަހު ކަމަށެވެ. އަދި އަގު ހުށަހަޅަން ޖެހެނީ މި މަހުގެ 16 ވަނަ ދުވަހު ކަމަށެވެ.

މީގެއިތުރުން އަގު ހުށަހެޅުމުގައި ބައިވެރިވެވޭނީ ރާއްޖޭގައި ރަޖިސްޓްރީކޮށްފައިވާ ދިވެހި ކުންފުންޏަކަށާއި ޕާޓްނަރޝިޕް ނުވަތަ އަމިއްލަ ވިޔަފާރިތަކަށް އެ އިއުލާނުގައި ވެއެވެ. އަދި އެ ކުންފުންޏަކީ އެ މަސައްކަތަށް ބޭނުންވާނެ ވަސީލަތްތައް ނުވަތަ އިކުއިޕްމަންޓް އޮޕަރެޓް ކުރާ ކުންފުންޏަކަށް ވާންވާނެ ކަމަށް ވެސް ވަނީ ބުނެފައެވެ.