މޯލްޑިވްސް މީޑިއާ ކައުންސިލް (އެމްއެމްސީ) ގެ 8 ވަނަ ދައުރަށް 10 މެމްބަރުން އިންތިހާބުކޮށްފިއެވެ.

މި މެމްބަރުން އިންތިހާބުކޮށްފައިވަނީ ޑިސެމްބަރ 7 ވަނަ ދުވަހު ހެނދުނު 10 ން 11 ޖަހަންދެން ސޯޝަލް ސެންޓަރުގައެވެ.

މި އިންތިހާބަކީ މިހާރުހިނގަމުންދާ 7 ދައުރުގައި ހިމެނޭ 10 މެމްބަރެއްގެ ދައުރު މި މަހުގެ 14 ވަނަ ދުވަހަށް ހަމަވާތީއެވެ.

މިއަދު ބޭއްވި އިންތިހާބުގައި 139 މީޑިއާއަކުން ވޯޓުލާފައިވާއިރު، 22 ކެންޑިޑޭޓުން ވާދަކުރިއެވެ.

މި އިންތިހާބުގައި މީޑިއާ ތަމްސީލުކުރާ ފަރާތްތަކުގެ ތެރެއިން އެމްއެމްސީގެ މެމްބަރުކަމަށް އިންތިހާބުވީ މިހާރު އޮންލައިންގެ ފާތިމަތު ޝަނާ (118 ވޯޓު) އާއި ވަގުތު އޮންލައިންގެ ނަޖާހް މަސްއޫދު (117 ވޯޓު) އާއި އާފަތިސްގެ ފަރާތުން ހަސަން ޝާކިރު (93 ވޯޓު) އާއި ހަފްސީ ޑޮޓްކޮމްގެ ހަފްސީ އަބްދުﷲ (75 ވޯޓު) އެވެ.

މީގެއިތުރުން ހަތާވީސް އޮންލައިންގެ ހުސެއިން ހަސަން ( 74 ވޯޓު) އާއި އެމްއެމްސީ 6 ވަނަ ދައުރުގެ ނައުިބު ރައީސް ތިލަދުން އޮންލައިންގެ ހުސެއިން ޘަގީފް (74 ވޯޓު) އަދި ދިޔަރެސްގެ ނަހުދާ ފާއިޒް (71 ވޯޓު) އެވެ.

މި އިންތިހާބުގައި އަމިއްލަގޮތުން ވާދަކުރި ފަރާތްތަކުގެ ތެރެއިން އިންތިހާބުވީ އެމްއެމްސީގެ ކުރީގެ ލީގަލް ހެޑް ފާތިމަތު ފަހުމީ (76 ވޯޓް) އާއި ނޫސްވެރިއެއްގެ ގޮތުގައި ކުރިން ހަރަކާތްތެރިވެފައިވާ އިބްރާހިމް މުހައްމަދު (49 ވޯޓް) އަދި އެމްއެމްސީގެ 6 ވަނަ ދައުރުގެ ވެސް މެމްބަރެއް ކަމުގައިވާ ގާނޫނީ ވަކީލު އިބްރާހިމް ފައުޒީ (80 ވޯޓު) އެވެ.

އެމްއެމްސީގެ ކައުންސިލު އެކުލެވިގެންވަނީ މީޑިއާގެ އިދާރާތައް ތަމްސީލުކުރާ 8 މެންބަރުންނާއި އާންމުންގެ ތެރެއިން އިންތިހާބު ކުރެވޭ 7 މެންބަރުންނާއެކު ޖުމްލަ 15 މެންބަރުންގެ މައްޗަށެވެ. މިއީ ދެ އަހަރުގެ ދައުރަކަށްވާއިރު، އެއްވެސް މެމްބަރަކަށް ޖެހިޖެހިގެން ދެ ދައުރުގައި ނުހުރެވޭނެއެވެ.

ދައުރުގެ މެދުތެރެއިން މެމްބަރަކު ވަކިކޮށް ނުވަތަ އިސްތިއުފާދީފިނަމަ، އަލަށް އިންތިހާބުވާ މެމްބަރުންގެ ދެ އަހަރު ގުނާނީ އިންތިހާބުކުރާ ދުވަހުން ފެށިގެންނެވެ.