ހުޅުމާލޭގައި ހުންނަ ކުޑަކުދިންގެ މަރުކަޒު، "ފިޔަވަތި"ގެ އަހަރީ ހަފުލާ، ރައީސް ޑރ. މުޙައްމަދު މުޢިއްޒުގެ އަނބިކަނބަލުން މެޑަމް ސާޖިދާ މުޙައްމަދު، ޝަރަފުވެރިކޮށްދެއްވައިފިއެވެ.

މި ހަފުލާ ބާއްވާފައިވަނީ ޑިސެމްބަރ 7 ވަނަ ދުވަހު ހަވީރު ފަރުކޮޅުފުށީގައެވެ. މި ހަފުލާގައި އެކަމަނާ ވަނީ ފިޔަވަތީގެ ކުދިން ހުށަހަޅައިދިން، ތަފާތު ހަރަކާތްތައް ބައްލަވާލައްވައި، އެކުދިންނަށް ހަދިޔާ ހަވާލުކޮށްދެއްވާފައެވެ.

އެކަމަނާ ވަނީ ފިޔަވަތީގެ ކުދިންނާއެކު ހަވީރުގެ ސައިފޮދެއްގައި ބައިވެރިވެވަޑައިގެން، އެކުދިންނާ ބައްދަލުކުރައްވައި، އެކުދިންނާއެކު ވަގުތު ހޭދަކުރައްވާފައެވެ.

ހައުސިންގ ޑިވެލޮޕްމަންޓް ކޯޕަރޭޝަން (އެޗް.ޑީ.ސީ) އިން ފިޔަވައްޗަށް ހަދިޔާކުރި "ގޭމް ރޫމް" އެ މަރުކަޒާ ރަސްމީކޮށް ހަވާލުކޮށްދެއްވާފައިވަނީ ވެސް މި ހަފުލާގައެވެ.

ފިޔަވައްޗަކީ ކުޑަކުދިންގެ ހިޔާގެ ބައެއްގެ ގޮތުގައި، ހުޅުމާލޭގައި ހިންގާ މަރުކަޒެކެވެ. މި މަރުކަޒުގައި ދައުލަތުން ބަލަހައްޓަނީ، އުމުރުން 13 އަހަރު ނުފުރޭ ކުޑަކުދިންނެވެ.