ގައުމުގެ މުސްތަގްބަލާއި ހަވާލުވެވޭނެ ފަދަ ޒިންމާދާރު، ލޮބުވެތި ދިވެހި ދަރިންތަކެއް ބިނާ ކުރުމަށް އެންމެން އެކުގައި، އެއް ރޫހެއްގައި ގައުމީ ވިސްނުމެއްގައި މަސައްކަތް ކުރެއްވުމަށް އަޒުމު ކަނޑައެޅުއްވުމަށް، ރައީސް ޑރ. މުޙައްމަދު މުޢިއްޒު އިލްތިމާސް ކުރައްވައިފިއެވެ.

އެ މަނިކުފާނު މި ފަދައިން އިލްތިމާސް ކުރެއްވީ، މާފަންނު މަދަރުސާއަށް40 އަހަރު ފުރުމުގެ މުނާސަބަތުގައި އޮތް ހާއްސަ ރަސްމިއްޔާތު ޝަރަފުވެރިކޮށްދެއްވައި، ވާހަކަފުޅުދައްކަވަމުންނެވެ.

ޑިސެމްބަރ 7 ވަނަ ދުވަހު ބޭއްވި މި ހަފުލާގައި ރައީސް ވަނީ މާތްވެގެންވާ އިސްލާމް ދީނުގެ ވަރުގަދަ އަގީދާގެ މަތީގައި ތިބި، ދިވެހި ގައުމު ދެކެ ލޯބިވާ، ގައުމިއްޔަތުގެ ރޫހު ފުރިހަމައަށް އަށަގެންފައިވާ ދަރިން ބިނާ ކުރުމަށް ވެސް ގޮވައިލައްވާފައެވެ.

މިރަސްމިއްޔާތުގައި ރާއްޖޭގެ މުސްތަގްބަލް އުޖާލާ ކަމަށާއި މި ރަސްމިއްޔާތުގައި އެކިއެކި ހުށަހެޅުންތައް ހުށަހަޅައިދިން ދަރިވަރުންގެ ކިބައިން ވެސް އެކަން ސާބިތުވެއްޖެ ކަމުގައި ވިދާޅުވިއެވެ. އަދި މިކަމުގެ ސަބަބުން ރަނގަޅު ބިންގަލެއްގެ މަތީގައި ދަރިވަރުން ބިނާކުރުމަށް ހިތްވަރަކަށް ވެގެންދާ ކަމުގައި ވެސް ވިދާޅުވިއެވެ.

މާފަންނު މަދަރުސާގެ ތަރައްގީއަށްޓަކައި އެ ސްކޫލުން ސަރުކާރުގައި އެދޭ ކޮންމެ ކަމެއް، ކުރިއަށް އޮތް ތަނުގައި ވެސް ކޮށްދެއްވަމުން ގެންދަވާނެ ކަމުގައި އެމަނިކިުފާނު ވަނީ ވިދާޅުވެފައެވެ. އަދި އެ މަދުރަސާ ބެލެހެއްޓުންތެރި ފަރާތުގެ ގޮތުގައި މި ވަގުތު އޮތް މާލޭ ސިޓީ ކައުންސިލުން ވެސް ސަރުކާރާ ގުޅިގެން، ސްކޫލުން އެދޭ ކަންކަން ފުރިހަމަކޮށްދެއްވުމަށް ގޮވާލައްވާފައި ވެއެވެ.