ރަހަވަރު ކެއްކުމުގެ މުބާރާތް އަންނައަހަރު ސްކޫލް ކުދިންނަށް ހުޅުވާލަން ގަސްދުކުރައްވާ ކަމުގައި ފިޝަރީޒް މިނިސްޓަރ އަޙްމަދު ޝިޔާމް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ މިއަހަރުގެ މަސްވެރިންގެ ދުވަހާއި ގުޅުވައިގެން ފިޝަރީޒް މިނިސްޓްރީން ބޭއްވި "ރަހަވަރު" ކެއްކުމުގެ މުބާރަތް ނިންމުމުގެ ރަސްމިއްޔާތުގައި ވާހަކަދައްކަވަމުންނެވެ.

އެމަނިކުފާނު ވިދާޅުވީ މިއަހަރު ކެއްކުމުގެ މުބާރާތް އާންމުންނަށް ހުޅުވާލައިގެން ބޭއްވި ނަމަވެސް، އަންނަ އަަހަރު ސްކޫލް ދަރިވަރުން އަމާޒުކޮށްގެން ބޭއްވުމުގެ ވިސްނުންފުޅު ގެންގުޅުއްވާ ކަމަށެވެ. އަދި ކުރިއަށްއޮތްތަނުގައި ވީހާވެސް ގިނަ ބަޔަކު ބައިވެރިވާގޮތަށް، އަތޮޅުތެރޭގެ ރަށްތަކުގައި ބޭއްވުމުގެ ވިސްނުން ގެންގުޅުއްވާކަމަށް ވެސް ވިދާޅުވިއެވެ.

"ރަހަވަރު" ގެ ނަމުގައި ކުރިއަށް ގެންދިޔަ މި މުބާރާތުން 1 ވަނަ ފަތްމިނި ކަމަނަ ޓީމަށް ލިބުނުއިރު، ދެވަނަ ހޯދީ ޓީމް ފުޑް ބަޑީސްއެވެ. އަދި ތިންވަނަ ލިބުނީ "ޓީމް ނޯޑިކް ބައިޓްސް" އަށެވެ.

މި މުބާރާތުގެ 1 ވަނަ ޓީމަށް 10،000 ރުފިޔާ ދީފައިވާއިރު، ދެވަނައަށް 7،000 ރުފިޔާ އަދި 3 ވަނައަށް 5،000 ރުފިޔާ ވަނީ ދީފައެވެ.

ރާއްޖޭގައި މަސްވެރިންގެ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ ވެސް ޑިސެމްބަރ މަހުގެ 10 ވަނަ ދުވަހެވެ. މިއަހަރުގެ މަސްވެރިންގެ ދުވަހުގެ ރަސްމީ ޖަލްސާ ބޭއްވުމަށް ހަމަޖެހިފައިވަނީ މާލޭގައެވެ.