އިސްރަށްވެހިންނަށް ވެސް ފަސޭހައިން ބޭނުންހިފޭގޮތަށް މާފަންނު މަދުރަސާގައި ހޯލެއް ހައްދަވައިދެއްވާނެ ކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ މާފަންނު މަދަރުސާއަށް 40 އަހަރު ފުރުމުގެ މުނާސަބަތުގައި އޮތް ހާއްސަ ރަސްމިއްޔާތު ޝަރަފުވެރިކޮށްދެއްވައި، ދެއްކެވި ވާހަކަފުޅުގައެވެ.

ޑިސެމްބަރ 7 ވަނަ ދުވަހު ބޭއްވި މި ހަފުލާގައި އެމަނިކުފާނު ވަނީ މާފަންނު މަދަރުސާގެ ފަރާތުން ދެ ދަރިވަރަކު އެ މަނިކުފާނަށް ދެންނެވި ފަދައިން، އިސްރަށްވެހިންނަށް ވެސް ފަސޭހައިން ބޭނުން ހިފޭ ފަދަ ގޮތަކަށް، 2025 ވަނަ އަހަރުގެ ތެރޭގައި، ސްކޫލުގެ ގްރައުންޑް ފްލޯރގައި، ހޯލެއް ތަރައްގީކޮށްދެއްވާނެ ކަމުގެ ޔަގީންކަން ދެއްވާފައެވެ.

ރައީސް ވަނީ ހާއްސަ އެހީއަށް ބޭނުންވާ ދަރިވަރުންނަކީ އެހެން ކުދިންނެކޭ އެއްފަދައިން، ސްކޫލު މާހައުލުގައި ޝާމިލުވާ ދަރިވަރުން ކަމުގައި ކަށަވަރު ކުރުމަށްޓަކައި، އެ ރޮނގުން މުދައްރިސުން ބިނާކޮށް، ތަމްރީނު ދިނުމުގެ މަސައްކަތްތައް ވެސް ކުރިއަށް އޮތް 2025 ވަނަ އަހަރުގެ ތެރޭގައި އިތުރަށް ފުޅާވެގެންދާނެ ކަމުގެ ޔަޤީންކަން ވެސް ދެއްވާފައެވެ.

މާފަންނު މަދަރުސާއަށް 40 އަހަރު ފުރުމުގެ މުނާސަބަތުގައި ކުރިއަށް ގެންދިޔަ ރަސްމިއްޔާތުގައި ރައީސް ވަނީ އެކި މަގާމުތަކުގައި އެ ސްކޫލަށް ދިގު މުއްދަތަކަށް ހިދުމަތް ކޮށްދެއްވާފައިވާ، އަދި މިހާރުވެސް ކޮށްދެއްވަމުން ގެންދަވާ މުވައްޒަފުންނަށް އެކަމުގެ ހަނދާނީ ފިލާ ހަވާލުކޮށްދެއްވާފައެވެ.

މިހާރުގެ މާފަންނު މަދަރުސާ ހުޅުވުނީ 1984 ވަނަ އަހަރުގެ ފެބުރުއަރީ މަހުގެ 15 ވަނަ ދުވަހުއެވެ. އެ މަދަރުސާ އުފެދުނު އިރު، ނަރސަރީން ފެށިގެން ގުރޭޑް 6 އަށް ކިޔަވައިދިނެވެ.

އޭގެ ފަހުން ގުރޭޑް 10ގެ ނިޔަލަށް ވެސް ކިޔަވައިދިނެވެ. އެހެންނަމަވެސް 2016 ވަނަ އަހަރުން ފަށައިގެން މާފަންނު މަދަރުސާ ހާއްސަކޮށްފައިވަނީ ނަރސަރީއާއި ޕްރީ ސްކޫލު އުމުރުފުރާގެ ދަރިވަރުންނަށެވެ.