ސަރުކާރަށް މި އަހަރުތެރޭގައި މަސައްކަތްތައް ކުރުމުގައި ދިމާވި އެންމެ ބޮޑު ހުރަހަކަށްވީ، ސިޔާސީ ވިސްނުމެއްގައި ކުރީގައި އޮތް މަޖިލީހުން ފާސްކޮށްފައި އޮތް ބަޖެޓު ކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ އަރިއަތޮޅު އުތުރުބުރިއާ މާލެ އަތޮޅުގެ ބައެއް ރަށްތަކަށް މިހާރު ކުރައްވަމުންގެންދަވާ ދަތުރުފުޅުގައި، އއ ތޮއްޑޫގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސް ވިދާޅުވީ އެ ބަޖެޓަކީ މި ސަރުކާރަށް އުނދަގޫ ކުރުމަށްޓަކައި އެކުލަވައިލި ބަޖެޓެއް ކަމަށެވެ.

އެހެންނަމަވެސް އެކަން މިހާރު އެ ނިމުނީ ކަމަށާއި ދެން ތަންފީޒުކުރަން ފައްޓަވާނީ މި ސަރުކާރުން ރައްޔިތުންނަށްޓަކައި ވެވަޑައިގެންފައި ހުރި ވައުދުތައް ފުއްދެވުމަށްޓަކައި މި ސަރުކާރުގެ އަޣުލަބިއްޔަތު އޮތް މަޖިލީހުން ފާސްކުރެއްވި ބަޖެޓުކަމަށް ވިދާޅުވިއެވެ.

އެމަނިކުފާނު ވަނީ ކުރިއަށް އޮތް ދެ އަހަރުދުވަހުގެ ތެރޭގައި އިރާދަކުރެއްވިއްޔާ މުޅި ރާއްޖޭގެ ހުރިހާ ކަންކޮޅެއްގައި، ބަހާލެވިގެން، ތަރުތީބެއްގެ ތެރެއިން، ރިޔާސީ ހުރިހާ ވައުދެއްގެ މަސައްކަތް ޢަމަލީގޮތުން ފަށްޓަވައި، އެކި މަޝްރޫއުތައް ނިމެމުން ދާނެކަމުގެ ޔަގީންކަން ވެސް ދެއްވާފައެވެ.