އެންޓި ކޮރަޕްޝަން ކޮމިޝަން (އޭސީސީ) ގެ މެމްބަރުކަމަށް ކުރިމަތިލާން ހުޅުވާލައިފިއެވެ.

ރައީސް އޮފީހުން ކުރައްވާފައިވާ އިއިލާނެއްގައި ވަނީ އެ ކޮމިޝަންގެ ދެ މެމްބަރުން އިސްތިއުފާ ދިނުމާއި ގުޅިގެން ހުސްވެފައިވާ މަގާމުތަކަށް ކުރިމަތިލުމުގެ ފުރުސަތު ހުޅުވާލާފައިވާ ކަމަށެވެ.

އެ ފުރުސަތު ހުޅުވާލެވިފައިވަނީ މި މަހުގެ 16 ވަނަ ދުވަހުގެ މެންދުރު 12 ޖެހުމާއި ހަމައަށެވެ.

އެ ކޮމިޝަންގެ މެމްބަރުކަމަށް ކުރިމަތިލެވޭނީ އުމުރުން 25 އަހަރުވެ، ފާއިތުވި 5 އަހަރު ދުވަހުގެ ތެރޭގައި ކުށެއް ކުރިކަން ޝަރީއަތަށް ސާބިތުވެފައިނުވާ މީހުންނަށެވެ. މެމްބަރު ކަމަށް ކުރިމަތިލުމުގެ ފޯމު ބަލައިގަންނާނީ ރަސްމީ ދުވަސް ދުވަހުގެ ހެނދުނު 8:30 އިން މެންދުރު 12 ޖަހަންދެން ރައީސް އޮފީހުންނެވެ.

އޭސީސީގެ ދެ މެންބަރަކު މަދުވީ ނައިބު ރައީސް ޢަބްދުއްސަލާމާއި މެންބަރު ޠޯޙާ މުޙައްމަދު މަގާމުން އިސްތިއުފާ ދެއްވުމުންނެވެ. އެ ދެ ބޭފުޅުން އިސްތިއުފާ ދެއްވާފައިވަނީ އޭސީސީގެ ގާނޫނާއި ހިލާފަށް ޢަމަލުކޮށްފައިވާ ކަމަށް ތުހުމަތުކޮށް، ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއަށް ހުށަހެޅުނު މައްސަލައަކާ ގުޅިގެން އެ ދެ މީހުން މަގާމުން ވަކިކުރުމަށް ނޮވެމްބަރ 25 ވަނަ ދުވަހު އެ ކޮމިޓީން ނިންމާފައި ވަނިކޮށެވެ.