ކީރިތި ޤުރުއާން ލިއުމާއި އިސްލާމިކް ކެލިގްރަފީ ދާއިރާއިން އާދަޔާޚިލާފު ފަންނުވެރިކަން ދައްކާލި ޖަމާލުއްދީން ސްކޫލުގެ ދަރިވަރު ހުސައިން ނާއިޝްއާއި އޭނާގެ ބެލެނިވެރިންނާ، އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ބައްދަލުކުރައްވައިފިއެވެ.

އިސްލާމިކް މިނިސްޓްރީގައި ބޭއްވި މި ބައްދަލުކުރެއްވުމުގައި މިނިސްޓަރު ވަނީ ނާއިޝް އެދުނު ގޮތަށް، އެދާއިރާއިން އޭނާއަށް ބޭނުންވާ އިތުރު ހުނަރު ދަސްކޮށް ދިނުމަށް މިނިސްޓްރީ އިން އެހިވާނެކަމަށް ވިދާޅުވެފައެވެ.

"ނާއިޝް ސްކޫލް ނިމުމުން، ޤުރުއާން މަރުކަޒު ތެރޭގައި މި ހުނަރު އެހެން ކުދިންނަށް ދަސްކޮށްދިނުމަށް އޭނާއާ މަސައްކަތްތަކެއް ޙަވާލު ކުރާނެ." މިނިސްޓަރު ވިދާޅުވިއެވެ.

މީގެއިތުރުން ރާއްޖޭގައި އަންނަ އަހަރު ހުޅުވާ އައްޑޫ އިސްލާމިކް ސެންޓަރާއި ހިތަދޫ އިސްލާމިކް ސެންޓަރާއި ފުވައްމުލައް ސިޓީގެ ޤުރުއާން މަރުކަޒުގައި ވެސް ނާއިޝްގެ އިސްލާމިކް ކެލިގްރަފީގެ ފަންނުވެރި ލިޔުންތައް ބަހައްޓާނެކަމަށް ވިދާޅުވިއެވެ.

ޑރ. ޝަހީމް ވަނީ އިސްލާމިކް ކެލިގްރަފީ ހެދުމަށް ބޭނުންވާ އެންމެހައި ޒަމާނީ ވަސީލަތްތައް މި ދަރިވަރަށް ހޯދައިދެވޭނެ ކަމަށް ވެސް ވިދާޅުވެފައެވެ. އަދި މި ދާއިރާއިން އިތުރު ހުނަރު އޭނާއަށް ދަސްކޮށްދިނުމަށް ދާއިރާގެ ފަންނުވެރިޔަކު ހަމަޖައްސާނެކަމުގެ ޔަގީންކަން ވެސް ދެއްވިއެވެ.

މިނިސްޓަރު އިތުރަށް ވިދާޅުވީ އިސްލާމީ ދާއިރާތަކުން ކުރިއަށް ދާން ޝައުގު ހުރި މިފަދަ ހުރިހައި ކުދިންނަށް މި ފުރުސަތު އޮންނާނެ ކަމަށެވެ.

ހުސައިން ނާއިޝް އަކީ އުފެދުމުގައި އަޑު އިވުމާއި ވާހަކަ ދެއްކުމުން މަހުރޫމުވެފައިވާ ކުއްޖެކެވެ. އެހެންނަމަވެސް، އޭނާ ވަނީ އޭނާގެ ހުނަރުވެރިކަން މުޅި ދުނިޔެއަށް ދައްކައިލާފައެވެ.