ގައުމީ ހިދުމަތުގެ ބިލު އެކުލަވާލުމަށްޓަކައި ކަމާއި ގުޅުންހުރި އިދާރާތަކާއިއެކު ހަޔަރ އެޑިއުކޭޝަންމިނިސްޓްރީން މަޝްވަރާތައް ފަށައިފިއެވެ.

ޑިސެމްބަރ 8 ވަނަ ދުވަހު ފެށި މި މަޝްވަރާތަކުގައި އެމް.އެން.ޑީ.އެފް އާއި ދިވެހި ފުލުހުންގެ ހިދުމަތުގެ އިސް ފަރާތްތަކުގެ ޚިޔާލާއި މަޝްވަރާ ވަނީ ހޯދާފައެެ.

މި މަޝަވަރާތަކަކީ ރައީސް ޑރ. މުޙައްމަދު މުޢިއްޒުގެ އިސްނެންގެވުމުގެ ދަށުން، ތައުލީމީ ދާއިރާގައި ނުވަތަ ވަޒީފާގެ މައިދާނުގައި ހަރަކާތްތެރިނުވާ ޒުވާނުންނަށް އަމާޒުކޮށްގެން ލާޒިމު ގައުމީ ހިދުމަތެއް ތައާރަފުކުރުމުގެ މަސައްކަތުގެ ތެރެއިން ފެށި މަޝްވަރާ ބައްދަލުވުންތަކެކެވެ.

ކިޔަވާ ނިމިގެން ނުވަތަ ގްރޭޑް 7 އާ ހަމައަށް ވިޔަސް ނިންމުމަށްފަހު ކިޔެވުމުގެ އިތުރު މަރުހަލާއަކަށް ނުގޮސް، ކިޔެވުމުގެ އިތުރު ފުރުސަތެއް ނުލިބި އަދި ވަޒީފާއެއް އަދާނުކުރާ، 16 އަހަރުވެފައިވާ ކުދިން، ގައުމީ ދިފާއީ ބާރުގެ ރެކްރޫޓްމަންޓް ޕްރޮގްރާމްގައި ބައިވެރިވުން މަޖުބޫރުވާގޮތަށް ގާނޫނެއް އެކުލަވާލައްވައި، ރާއްޖޭގެ ގައުމީ ހިދުމަތުގެ ޕްރޮގްރާމެއް 2025 ވަނަ އަހަރުން ފެށިގެން ކުރިޔަށް ގެންދެވުމަށް ނިންމާފައިވަނީ މިއަހަރުގެ ނޮވެމްބަރ 4 ވަނަ ދުވަހުއެވެ.