ދިވެހި ބަހުގެ އެކަޑެމީ ހިންގުން އިބްރާހީމް ވަހީދު (އޮގަރު ވަހީދު) އާ ހަވާލުކޮށްފިއެވެ.

މިނިސްޓްރީ އޮފް ދިވެހި ލެންގުއޭޖް، ކަލްޗަރ އެންޑް ހެރިޓޭޖުން އެ މިނިސްޓްރީގެ މުވައްޒަފުންނަށް ފޮނުއްވާފައިވާ މެމޯއެއްގައި ވަނީ އެ މިނިސްޓްރީގެ ޑެޕިއުޓީ މިނިސްޓަރު އޮގަރު އިބްރާހިމް ވަހީދު އަށް ދިވްހި ބަހުގެ އެކެޑެމީ ހިންގުން ހަވާކުރެއްވީ ހިންގުން ހަރުދަނާ ކުރުމަށް ކަމަށެވެ.

މިނިސްޓްރީން މި ބަދަލުގެންނަވާފައި މިވަނީ ދިވެހި ބަހުގެ އެކަޑެމީއިން މުވައްޒަފުންތަކަކާމެދު ގަވާއިދާ ހިލާފަށް ފިޔަވަޅު އަޅާފައިވާކަން ސިވިލް ސަރވިސް ކޮމިޝަން (ސީއެސްސީ) އިން ފާހަގަކޮށްފައިވާ ދަނޑިވަޅެއްގައެވެ.

ދިވެހި ބަހުގެ އެކަޑެމީ އާއި ސަގާފީ ތަރިކަ ރައްކާތެރިކުރާ ގައުމީ މަރުކަޒަށް އަމާޒުކޮށް ކުރިއަށްގެންދިޔަ ސްޕޮޓް ޗެކް ރިޕޯޓެއްގައި ސީއެސްސީން ވަނީ ދިވެހި ބަހުގެ އެކަޑެމީގައި މަސައްކަތްކުރަމުންދާ މުވައްޒަފުންނާމެދު ހާޟިރީއާ ގުޅިގެން މުވައްޒަފުންނަށް އިސްލާހީ ފިޔަވަޅު އެޅުމުގެ ގަވާއިދުތަކާއި އުސޫލުތަކާ އެއްގޮތަށް ޢަމަލުކޮށްފައިނުވާކަން ފާހަގަކޮށްފައެވެ.

އެގޮތުން 10 ޖަނަވަރީ 2023 އިން 30 ސެޕްޓެމްބަރ 2024 އިދާރާގެ އެއްވެސް މުވައްޒަފަކަށް އެއްވެސް ކަމަކާ ގުޅިގެން އިސްލާހީ ފިޔަވަޅު އަޅާފައިނުވާކަން ވަނީ ފާހަގަކޮށްފައެވެ. އަދި އެ މުއްދަތުގައި ބައެއް މުވައްޒަފުން ތަކުރާރުކޮށް ގަޑިޖެހިގެން އޮފީހަށް ހާޟިރުވެފައިވާކަމާއި ބައެއް މުވައްޒަފުންނަކީ އާދަވެ، ގަޑިޖެހުމުގެ ސަބަބުން އިސްލާހީ ފިޔަވަޅު އެޅުމަށް ސީއެސްސީގެ ގަވާއިދު 2014 ގައި ބަޔާންކުރާ ދަރަޖައަށް ފެތޭ މުވައްޒަފުން ކަމުގައި ވެސް އެ ރިޕޯޓުގައި ވެއެވެ.

އެހެންނަމަވެސް އެފަދަ މުވައްޒަފުންނަށް އިސްލާހީ ފިޔަވަޅު އަޅާފައިނުވާކަން ސީއެސްސީން ފާހަގަކޮށްފައިވެއެވެ.