ނިމިދިޔަ އެމްޑީޕީން ބަޖެޓު ހުށަހެޅީ އަލަށް ހޮވުނު ސަރުކާރުގެ ޓްރާންޒިޝަން ކޮމިޓީގެ މަޝްވަރާއާއެކުގައި ކަމަށް ކުރީގެ ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ މި ސަރުކާރުގެ ފުރަތަމަ އަހަރުގެ މަޝްރޫއުތައް ކުރިއަށްނުގެންދެވުނީ ނިމިދިޔަ މަޖިލީހުގެ ދައުރުގައި ފާސްކުރި ބަޖެޓުގައި އެ ފުރުސަތު ލިބިދީފައި ނެތުމުން ކަމަށް ރައީސް ޑރ. މުޙައްމަދު މުއިއްޒު ވިދާޅުވުމާއި ގުޅިގެންނެވެ.

"އެކްސް' ގައި ކުރެއްވި ޕޯސްޓެއްގައި އަމީރު ވިދާޅުވީ އެމްޑީޕީގެ އަޣުލަބިއްޔަތު އޮތް މަޖިލީހަށް ސަރުކާރުން ބަޖެޓު ހުށަހެޅީ އަލަށް ހޮވުނު ސަރުކާރުގެ ޓްރާންޒިޝަން ކޮމިޓީގެ މަޝްވަރާއާއެކު ކަމަށެވެ. އަދި އެ ކޮމިޓީން ފޮނުވި ލިސްޓުގައި ހިމެނޭ ކަންތައްތައް ވެސް އެ ބަޖެޓުގައި ހިމަނައިފައި ވާނެ ކަމަށް ވިދާޅުވިއެވެ.

"ތިއީ ކަނޑައެޅިގެން ދޮގެއް! ޓްރާންޒިޝަން މުއްދަތުގައި ހުށަހެޅުނު ސަޕްލެމެންޓަރީ ބަޖެޓް ވެސް އަދި 2024 ވަނަ އަހަރުގެ ބަޖެޓް ވެސް ހުށަހެޅީ ޓްރާންޒިޝަން ކޮމިޓީގެ މަޝްވަރާއާކު. 2024 ވަނަ އަހަރަށް ހުށަހެޅުނު ބަޖެޓްގައި ތި ބޭފުޅުން ފޮނުވި ލިސްޓް އޮތް ގޮތަށް ބަޖެޓްގައި ހިމެނިފައިވާނެ." އަމީރު ވިދާޅުވިއެވެ.

މީގެއިތުރުން ބަޖެޓު އޮތް ގޮތުން ކަންތައް ނުވިޔޭ، ވިދާޅުވާއިރު، މި ހާލަތަށް އައީވެސް ސީދާ ބަޖެޓްގައި ނުވެސް ހިމެނޭ އާ ކަންތައްތަކެއް ކުރުމުގެ ސަބަބުން ކަމަށް އަމީރު ވިދާޅުވިއެވެ. އަދި ބަޖެޓް ޕްލޭނާއި އެއްގޮތަށް ގެންދިޔަ ނަމަ، އިގްތިސާދީ ހަރަކާތްތައް ނުހުއްޓި ކުރިޔަށް ދާނެ ކަމަށާއި އަމިއްލަ ފަރުދުންނާއި ކުންފުނިތައް ބަނގުރޫޓް ނުވީސް ކަމަށް ވިދާޅުވިއެވެ.

އަމީރު އިތުރަށް ވަނީ ފުށިދިއްގަރު ފަޅު ހިއްކަން އެތައް ސަތޭކަ މިލިއަން ޚަރަދުކުރި ކަމަށާއި 37.2 މިލިއަން ޑޮލަރު ހޭދަކުރީ ތުރުކީ ވިލާތުން ޑްރޯން ގަންނަން ކަމަށް ވިދާޅުވެފައެވެ. އަދި މިދިޔަ އަހަރާއި އަޅާބަލާއިރު، މިއަހަރުގެ މިހާތަނަށް ހަމައެކަނި މުސާރަޔަށް 1.425 ބިލިއަން އިތުރަށް ހަރަދުކޮށްފައިވާ ކަމަށް ވެސް ވިދާޅުވިއެވެ.

މީގެއިތުރުން ވެސް ބަޖެޓުގައި ނުހިމެނޭ އެތައްކަމެއް ކޮށްފައި އެބަހުރި ކަމަށާއި ރަށެއްގައި ޕްރޮޖެކްޓް ނުހިނގާތީ ސުވާލުކުރީމައި ކުރީ ސަރުކާރު، ކުރީ ސަރުކާރު ކިޔުން ހުއްޓަން ވެއްޖެ ކަމަށް ވެސް ވަނީ ވިދާޅުވެފައެވެ.

އެމްޑީޕީ ސަރުކާރުގެ ފިނޭންސް މިނިސްޓަރު ވަނީ ރައްޔިތަކަށް ކަމެއްކޮށްދޭންވީމައި ކުރީ ސަރުކާރު ބަޖެޓާއިހެދި ކަމެއް ނުވެޔޭ ކިޔާއިރު، ބަޖެޓުގައި ނުވެސް ނެތް ކަންތައްތައް ކޮށްފައި އެބަހުރިކަން ތަކުރާރުކުރައްވާފައެވެ.

ތިއީ ކަނޑައެޅިގެން ދޮގެއް! ޓްރާންޒިޝަން މުއްދަތުގައި ހުށަހެޅުނު ސަޕްލެމެންޓަރީ ބަޖެޓް ވެސް އަދި 2024 ވަނަ އަހަރުގެ ބަޖެޓް ވެސް ހުށަހެޅީ ޓްރާންޒިޝަން ކޮމިޓީގެ މަޝްވަރާއާެކު. 2024 ވަނަ އަހަރަށް ހުށަހެޅުނު ބަޖެޓްގައި ތި ބޭފުޅުން ފޮނުވި ލިސްޓް އޮތް ގޮތަށް ބަޖެޓްގައި ހިމެނިފައިވާނެ.… https://t.co/9S4EG4vqFE

— Ibrahim Ameer (@iameeru) December 8, 2024