މޯލްޑިވްސް ނެޝަނަލް ސްކިލްސް ޑިވެލޮޕްމަންޓް އޮތޯރިޓީ (އެމް.އެން.އެސް.ޑީ.އޭ) އިން ނޭޝަނަލް އެސެސަރ ޓްރެއިނިންގ ޕްލޭން ލޯންޗުކޮށްފިއެވެ.

ހ. މީރުމާގައި އެކަމަށްޓަކައި ބޭއްވި ހާއްސަ ހަފްލާއެއްގައި މި ޕްލޭން ލޯންޗްކޮށްދެއްވީ ހަޔަރ އެޑިއުކޭޝަން މިނިސްޓަރ ޑރ. މަރިޔަމް މާރިޔާއެވެ.

މިއީ ރާއްޖޭގައި ފަންނީ ހުނަރުވެރި މަސައްކަތްތެރީން ބިނާކުރުމަށް ހިންގާ ތަމްރީނު ޕްރޮގްރާމުތައް އެސެސްކުރުމުގެ މަސައްކަތުގައި ހަރަކާތްތެރިވާ ނޭޝަނަލް އެސެސަރުންގެ މަސައްކަތުގެ ފެންވަރު އެއް މިންގަނޑެއްގައި ދެމެހެއްޓުމަށްޓަކައި ވޯލްޑް ބޭންކުގެ އެހީގައި އެކުލަވާލައިފައިވާ ޕްލޭނެކެވެ.

މި ޕްލޭން އެކުލަވާލުމުގެ ޕްރޮޖެކްޓްގެ ބައެއްގެ ގޮތުގައި ނޭޝަނަލް އެސެސަރ ޓްރޭނިންގ މެނުއަލްއެއް އެކުލަވާލައި, މިހާތަނަށް 29 ފަރާތެއްވަނީ ޓްރޭނިންގ އޮފް ޓްރޭނަރސް ފުރިހަމަކޮށްފައެވެ.

އެމް.އެން.އެސް.ޑީ.އޭ އިން މައުލޫމާތުދޭގޮތުގައި, އެ އޮތޯރިޓީގައި 201 ނޭޝަނަލް އެސެސަރުން ދަފްތަރުކޮށްފައިވެއެވެ.

މި ހަފްލާގައި މިނިސްޓަރ ޑރ. މަރިޔަމް މާރިޔާ ވިދާޅުވީ މަތީ ތަޢުލީމާއި ތަމްރީނުގެ ގާނޫނުގެ ދަށުން މެންޑޭޓް ކުރެވިފައިވާ ގޮތުގައި، އެމްއެންއެސްޑީއޭ އަށް ވަނީ ވަރަށް މުހިންމު ޒިންމާއެއް ހަވާލުކުރެވިފައިކަމަށެވެ.

"އެއީ އަޅުގަނޑުމެންގެ ދަރިވަރުންގެ ކާމިޔާބީތައް ގައުމީ ކޮމްޕިޓެންސީ މިންގަނޑުތަކާ އަޅާކިޔައި، ވަރަށް ފުރިހަމައަށް ވަޒަންކުރާ ކޮމްޕިޓެންސީ-ބޭސްޑް އެސެސްމަންޓްތައް ހިންގުން." މިނިސްޓަރ ވިދާޅުވިއެވެ.

މީގެއިތުރުން މި ލޯންޗް ކުރި ނޭޝަނަލް އެސެސަރ ޓްރެއިނިންގ ޕްލޭންއަކީ އެ މެންޑޭޓްގެ ޒިންމާ ފުރިހަމަކުރުމަށް ކުރަމުންދާ މަސައްކަތުގެ އަލިގަދަ ހެއްކެއްކަމުގައި ފާހަގަކުރެއްވިއެވެ.

މި ހަފްލާގައި އެމް.އެން.އެސް.ޑީ.އޭއިން ކުރަމުން ގެންދާ މަސައްކަތްތަކުގެ މައްޗަށް އަލިއަޅުވާލައި, އެ އޮތޯރިޓީގެ ސީ.އީ.އޯ. ޑރ. ޒަހްރާ މުޙައްމަދު ހާއްސަ ޕްރެޒެންޓޭޝަނެއް ހުށަހަޅައިދެއްވިއެވެ.

މިނިސްޓްރީގެ އިސްބޭފުޅުންނާއި މިނިސްޓްރީގެ ދަށުން ހިންގާ އިދާރާތަކުގެ ސީއީއޯއިންނާއި ވޯލްޑްބޭންކް ޓީމުގެ މެންބަރުންނާއި ގައުމީ އެސަސަރުން މި ހަފްލާގައި ބައިވެރިވެވަޑައިނެވިއެވެ.