ބޭންކް އޮފް މޯލްޑިވްސް (ބީއެމްއެލް) ގެ އެކައުންޓެއް އޮތްނަމަ، 48 ގަޑިއިރު ތެރޭގައި މަސްވެރިންނަށް ފައިސާ ޖަމާވާނެކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އއ. އަދި ކ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ކ. ގާފަރަށްވަޑައިގެން އެ ރަށުގެ ރައްޔިތުންނާ ބައްދަލުކުރައްވައި، ވާހަކަފުޅު ދައްކަވަމުން އެމަނިކުފާނު ވިދާޅުވީ މިހާރުވާނީ މަސްވެރިންނަށް ދޭންޖެހޭ ހުރިހާ ފައިސާއެއް ދީ ޚަލާސްކޮށްފައި ކަމަށެވެ.

އެމަނިކުފާނު ވިދާޅުވީ މާދަމާއިން ފެށިގެން 48 ގަޑިއިރުގެ ތެރޭގައި ފައިސާ ޖަމާކޮށްދޭނީ ބީއެމްއެލްގައި އެކައުންޓު ހުރި ފަރާތްތަކަށް ކަމަށެވެ.

ރައީސް ވަނީ ފިނޭންސް މިނިސްޓްރީއާއި މިފްކޯ އަދި ބީއެމްއެލްއާ ދެމެދު ވަރަށް މުހިންމު އެގްރިމެންޓެއްގައި ސޮއިކޮށްފައިވާ ކަމަށާއި މި އިންތިޒާމްތަކާ އެކު ބީއެމްއެލްގައި އެކައުންޓެއް އޮތް ނަމަ މަސް ކިރާތާ 48 ގަޑި އިރުގެތެރޭގައި ފައިސާ ޖަމާކޮށްދޭނެކަން ހާމަކުރައްވާފައެވެ.

މީގެއިތުރުން އެމަނިކުފާނު ވަނީ އެމްއައިބީގައި އެކައުންޓު ހުރި ފަރާތްތަކަށް ވެސް އިތުރު ގޮތްތަކެއް ހޯދަން ޖެހޭ ކަމަށެވެ.

މަސްވެރިކަމުގެ ސިނާއަތް ކުރިއެރުވުމަށް ސަރުކާރުން ހާއްސަ އިސްކަމެއް ދެއްވާކަން ހާމަކުރައްވައި، އެގޮތުން ރާއްޖޭގައި މަސް ރައްކާކުރުމުގެ ގާބިލުކަން ދެގުނަ ކުރުމާއި ޕްރޮސެސިންގެ ފެސިލިޓީތަކުގެ މަސައްކަތްތައް ވެސް ކުރިއަށްދާނެކަން ރައީސް ފާހަގަކުރެއްވިއެވެ.