ގާނޫނު އަސާސީން ރައްޔިތުން ބޭނުންވަނީ ތިން ބާރު ވަކިވެފައިވާ ނިޒާމެއް ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެއެވެ.

އެމްޑީޕީން "ގާނޫނުއަސާސީގެ ދިފާއުގައި – ވިލިމާލެ" ނަމުގައި ބޭއްވި ހަފުލާގައި އެމަނިކުފާނު ވިދާޅުވީ ފެހި ގާނޫނު އަސާސީ ވުޖޫދަށް ގެނެސްފައިވަނީ ވަރަށް ރަނގަޅު މަގުސަދެއްގައި ކަމަށެވެ. އަދި އެގާނޫނު އަސާސީ ގެނައުމަށް މުޅި ރާއްޖޭގެ ރައްޔިތުން ބުރަ މަސައްކަތްތަކެއް ކުރި ކަމަށެވެ.

މީގެއިތުރުން ރާއްޖޭގެ ގާނޫނު އަސާސީއަށް ގެނެސްފައިވަނީ އިސްލާހެއް ނޫންކަން ފާހަގަކުރައްވައި، ވިދާޅުވީ އެއީ ގާނޫނު އަސާސީ ގަޑުބަޑު ކުރުން ކަމަށެވެ. އަދި ގާނޫނު އަސާސީއާ އެއްގޮތަށް މިނިވަންކަމާއެކު މިނިވަން މުއައްސަސާތައް ފަންކްޝަންކޮށް، ޖުޑިޝަރީ އިންސާފުވެރިވާންޖެހޭ ކަމަށެވެ.

"ގައުމުގައި ރަނގަޅުކުރަންޖެހޭ ވަރަށް ގިނަކަންކަން އެބަހުރި. ރައްޔިތުންނަށް ލިބެމުންދިޔަ ހިދުމަތްތައް ކަމަށްވާ އާސަންދަ، އެންސްޕާ ފަދަ ހިދުމަތްތައް ހަރުދަނާކޮށް، އެކަންކަން ރަނގަޅު ކުރަންޖެހޭ." ކުރީގެ ނައިބު ވިދާޅުވިއެވެ.

ހަމަމިއާއެކު ރާއްޖޭގެ ރައްޔިތުންގެ ބުރަ މަސައްކަތުން އެތައް ހިންމަތެއް ކޮށްގެން ރެއާދުވާލު އެކުރެވުނު މަސައްކަތުން ގާނޫނު އަސާސީ ހޯދަން ޖެހުނީ ތިންބާރު ވަކިވެފައިވާ ނިޒާމެއް ކަނޑައަޅަން ކަމަށެވެ.

ރައްޔިތުންގެ މަޖިލީހަށް އިޝާރާތް ކުރައްވައި ފައިސަލް ވިދާޅުވީ އެތަނުގައި ތިބެނީ ރައްޔިތުން އިންތިހާބު ކުރާ ރައްޔިތުންގެ ހައްގުގައި ވަކާލާތުކުރާ މެންބަރުން ކަމަށާއި ރައްޔިތުންނަށް ކަމެއްދިމާވާ ހާލަތުގައި ރައްޔިތުންގެ ވާހަކަދައްކަންޖެހޭ މެންބަރުން ކަމަށެވެ.

އެހެންނަމަވެސް މިސަރުކާރުން ގާނޫނު އަސާސީއަށް މިގެނައި ބަދަލާއެކު މަޖިލިސް މެންބަރަކު ކިތަންމެ ބޮޑަށް ރައްޔިތުންގެ ހައްގުގައި ވާހަކަދައްކަވަން ބޭނުންވިނަމަވެސް އެކަން ނުކުރެވި، އެ ހައްގު ނިގުޅައިގަނެފައިވާ ކަމަށް ވެސް ވިދާޅުވިއެވެ.