ގައުމީ އެސެސަރުންގެ ޕްރޮފެޝަނަލް ތަރައްގީއަށް އިންވެސްޓްކުރުމަކީ ރާއްޖޭގެ ފަހި މުސްތަގްބަލަށް ކުރެވޭ އަގުހުރި އިންވެސްޓްމަންޓެއްކަމަށް ހަޔަރ އެޑިއުކޭޝަމް މިނިސްޓަރ ޑރ. މަރިޔަމް މާރިޔާ ވިދާޅުވެއްޖެއެވެ.

މިނިސްޓަރ މިހެން ވިދާޅުވީ މޯލްޑިވްސް ނެޝަނަލް ސްކިލްސް ޑިވެލޮޕްމަންޓް އޮތޯރިޓީ (އެމް.އެން.އެސް.ޑީ.އޭ) އިން ނޭޝަނަލް އެސެސަރ ޓްރެއިނިންގ ޕްލޭން ލޯންޗުކުރުމަށް ހ. މީރުމާގައި ބޭއްވި ހާއްސަ ރަސްމިއްޔާތުގައެވެ.

އެކަމަނާ ވިދާޅުވީ މި ތައާރަފުކުރާ ގައުމީ އެސެސަރުން ތަމްރީނުކުރުމުގެ ޕްލޭނަކީ ހަމައެކަނި ލިޔުމެއް ނޫންކަމަށެވެ. މިއީ ހާއްސަކޮށް މިހާރު ރަޖިސްޓްރީވެފައިވާ އެސެސަރުންނަށާއި ކުރިމަގުގައި މި ޓީމުގެ ސަފުތަކާ ގުޅޭނެ ފަރާތްތަކަށް ހާއްސަކޮށް ފަރުމާކުރެވިފައިވާ ޕްލޭނެއްކަމަށެވެ.

މީގެއިތުރުން މި ޕްލޭނުން ސީދާ އަމާޒުކުރަނީ ގައުމަށް ދިމާވެފައިވާ އެންމެ ބޮޑު ގޮންޖެހުންތަކުގެ ތެރެއިން އެއް ގޮންޖެހުމަށްކަމަށާއި އެއީ އެކި ދާއިރާތަކުގައި ހުނަރުތައް އިމްތިހާނުކޮށް، ވަޒަންކޮށް، އަދި ސަނަދު ދެވޭނެ ފެންވަރު ރަނގަޅު އެސެސަރުން ހޯދައި ތަރައްގީކުރުންކަމަށް ވިދާޅުވިއެވެ.

މިނިސްޓަރ ވިދާޅުވީ އަމާޒަށް ވާސިލް ވުމަށްޓަކައި މިހާރުވެސް ވަނީ ފާހަގަކުރެވޭ ކުރިއެރުންތަކެއް ހޯދާފައިކަމަށެވެ. އެގޮތުން މިވަގުތު އެމްއެންއެސްޑީއޭގައި 201 ގައުމީ އެސެސަރުން ރަޖިސްޓްރީވެފައިވާއިރު، މިއީ އެކި ދާއިރާތައް ތަމްސީލުކުރާ އަދި ގައުމުގެ ތައުލީމީ ނިޒާމަށް ތަޖުރިބާއާއި ހުނަރު ގެނެސްދޭ ބައެއްކަމަށް ވިދާޅުވިއެވެ.

ހަމަމިއާއެކު އެސެސްމަންޓް އޮނިގަނޑުގެ ފެންވަރު އިތުރަށް މަތިކުރުމަށްޓަކައި، ފުރިހަމަ ތަމްރީނު މެނުއަލެއް އެކުލަވާލައި، 29 ޓްރެއިނިންގ އޮފް ޓްރެއިނަރުން ތަމްރީނުކުރުމަށް އިންވެސްޓްކޮށްފައިވާ ކަމަށް ވަނީ ވިދާޅުވެފައެވެ.

މި ޓްރެއިނަރުންނަކީ ދެމެހެއްޓެނިވި ހުނަރު ތަރައްގީކުރުމުގެ ސްޓްރެޓެޖީގައި މުހިންމު ދައުރެއް އަދާކުރާނެ ބައެއް ކަމަށްވެސް މިނިސްޓަރ ވިދާޅުވިއެވެ.

މިއީ ރާއްޖޭގައި ފަންނީ ހުނަރުވެރި މަސައްކަތްތެރީން ބިނާކުރުމަށް ހިންގާ ތަމްރީނު ޕްރޮގްރާމުތައް އެސެސްކުރުމުގެ މަސައްކަތުގައި ހަރަކާތްތެރިވާ ނޭޝަނަލް އެސެސަރުންގެ މަސައްކަތުގެ ފެންވަރު އެއް މިންގަނޑެއްގައި ދެމެހެއްޓުމަށްޓަކައި ވޯލްޑް ބޭންކުގެ އެހީގައި އެކުލަވާލައިފައިވާ ޕްލޭނެކެވެ.