ޓޫރިސްޓު ވިސާގައި ރާއްޖެ އައިސް ވިޔަފާރިކުރަމުން ދިޔަ ބިދޭސީ މީހެއް އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

މޯލްޑިވްސް އިމިގްރޭޝަނުން ވިދާޅުވީ ޓޫރިސްޓް ވިސާގައި ރާއްޖެ އެތެރެވެ، ވިޔަފާރީގައި ޝާމިލްވެ އުޅުނު ބިދޭސީއެއް ހޯދައި އެ އިދާރާގެ ބެލުމުގެ ދަށަށް ގެންގޮސްފައިވާ ކަމަށެވެ.

އެ އިދާރާ އިން ވިދާޅުވީ ފަތުރުވެރިންގެ ގޮތުގައި ރާއްޖެ އައިސް، ވިޔަފާރީގެ ހަރަކާތްތަކުގައި ބައިވެރިވާ ފަރާތްތަކާ ގުޅޭ ޝަކުވާތައް އެ އިދާރާއަށް ލިބެމުންދާ ކަމަށް ފާހަގަކޮށްފައިވެއެވެ. އަދި އެ ފަރާތްތަކުން އާންމު ތަންތަނުގައި ދިރިއުޅެ، ނިދާކަމުގެ ރިޕޯޓުތަކެއް ވެސް ލިބިފައިވާކަމަށް ވިދާޅުވިއެވެ.

އިމިގްރޭޝަނުން ހިފަހައްޓާފައިވާ ކުއިޕިން ފެންގް ނަމަކަށް ކިޔާ 33 އަހަރުގެ އެ އަންހެން މީހާ ރާއްޖެ އައި ދުވަހެއް އިމިގްރޭޝަނުން އަދި ހާމައެއް ނުކުރައްވައެވެ. އޭނާ އިމިގްރޭޝަނުން ހިފަހައްޓާފައިވަނީ އާއްމުންގެ މީހަކު ކުރި ރިޕޯޓަކާއި ގުޅިގެންނެވެ.

މި ސަރުކާރު އައިފަހުން އިމިގްރޭޝަނުން އަންނަނީ ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ގިނަ މަސައްކަތްތަކެއް ކުރަމުންނެވެ. އެ މަސައްކަތުގެ ދަށުން ގަވާއިދާ ހިލާފަށް ރާއްޖޭގައި އުޅުނު 5،000 އަށްވުރެ ގިނަ ބިދޭސީން ވަނީ ޑީޕޯޓްކޮށްފައެވެ.