ނެޝަނަލް އިންޓެގްރިޓީ ކޮމިޝަން (އެންއައިސީ) ގެ މެންބަރުކަމަށް އަލްއުސްތާޛާ މަރްޔަމް އިންޝާ ފައިޞަލް އައްޔަންކުރަން ރައްޔިތުންގެ މަޖިލީހުން ފާސްކޮށްފިއެވެ.

އެކޮމިޝަންގެ މެންބަރުކަމަށް އިންޝާ އައްޔަންކުރަން ފާސްވީ ވޯޓުގައި ބައިވެރިވެވަޑައިގެންނެވި 58 މެންބަރުންގެ ވޯޓާއެކުއެވެ.

ގާނޫނީ ދާއިރާއިން ޑިގްރީ ހާސިލްކުރައްވާފައިވާ އިންޝާ ގެ ނަން، އެ ކޮމިޝަންގެ މެންބަރުކަމަށް އައްޔަންކުރެއްވުމަށް ރައްޔިތުންގެ މަޖިލީހަށް ރައީސް ޑރ. މުޙައްމަދު މުޢިއްޒު ފޮނުއްވީ މިދިޔަ މަހުގެ 23 ވަނަ ދުވަހުއެވެ.

އިންޝާ ވަނީ ޕޮލިސް އިންޓެގްރިޓީ ކޮމިޝަންގައި ވެސް މަސައްކަތްކުރައްވާފައެވެ. އަދި އެކޮމިޝަން އުވާލުމަށްފަހު، ނެޝަނަލް އިންޓެގްރިޓީ ކޮމިޝަން 2015 ވަނަ އަހަރު އުފެދުމާއެކު އެކަމަނާ ވަނީ އެކޮމިޝަންގައި އިންވެސްޓިގޭޓަރެއްގެ ގޮތުގައި މަސައްކަތްކުރައްވާފައެވެ. އެގޮތުން މިއަހަރުގެ ޖެނުއަރީ މަހާ ހަމައަށް ވެސް ހުންނެވީ އެމަގާމުގައެވެ. މިހާރު އިންޝާ ދަނީ މާސްޓަރސް ޑިގްރީ ހާސިލްކުރައްވަމުންނެވެ.

ނެޝަނަލް އިންޓެގްރިޓީ ކޮމިޝަންގައި 5 މެންބަރުން ތިއްބަވާއިރު، މިހާރު އެކޮމިޝަންގައި ތިއްބެވި މެންބަރުންނަކީ ކޮމިޝަންގެ ރައީސް ޤާސިމް ޢަބްދުލްކަރީމާއި ނައިބު ރައީސާ އާޝިޔަތު ޝިއުނާއާއި މެންބަރު އާމިނަތު ޝާދިޔާއާއި ޝުއައިބު އަބްދުއްރަޙްމާނެވެ.