ފުލުހުންގެ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމެންޓް ނުވަތަ ޕޮލިސް އެކަޑެމީ މަރާމާތު ކުރުމަށް އިންޑިއާ އިން 8.5 މިލިއަން ޑޮލަރު ރާއްޖެއަށް ދިނުމަށް ނިންމާފައިވާކަމަށް ހޯމް މިނިސްޓަރ ޢަލީ އިހްސާން ހާމަކުރައްވައިފިއެވެ.

އެމަނިކުފާނު މިކަން ހާމަކުރެއްވީ ފުލުހުންގެ 37 ވަނަ އަސާސީ ތަމްރީނު ކޯހުގެ ދަސްވެނިވުމުގެ ރަސްމިއްޔާތު ބައިވެރިވެވަޑައިގެން ވާހަކަ ދައްކަވަމުންނެވެ.

މިނިސްޓަރު ވަނީ އެކަމަށްޓަކައި އިންޑިއާ ސަރުކާރަށް ޝުކުރު ދަންނަވާފައެވެ. އަދި މިކަމުން ދައްކުވައިދެނީ ރާއްޖެ އާއި އިންޑިއާއާ ދެމެދު އޮތް ގާތް ގުޅުންކަން ފާހަގަކުރެއްވިއެވެ.

މި ރަސްމިއްޔާތުގައި މިނިސްޓަރު ވަނީ ފުލުހުންގެ އަސާސީ ތަމްރީނު ފުރިހަމަ ކުރި އޮފިސަރުން ހަވާލުވަނީ ބޮޑު ޒިންމާއެއްކަން ފާހަގަކުރައްވައި، އެ ޒިންމާ އަދާކުރުމުގައި، ނަޒާހަތްތެރިކަމާއެކު މަސައްކަތް ކުރުމަށް ގޮވާލައްވާފައެވެ.

މީގެއިތުރުން މިވީ އެއް އަހަރު ތެރޭގައި ގިނަ ކާމިޔާބީތައް ފުލުހުންގެ ހިދުމަތުން ހާސިލްކޮށްފައިވާއިރު، އެއަށް ވުރެ ބޮޑު ކާމިޔާބީތަކެއް ހާސިލްކުރުމަށް މަސައްކަތް ކުރުމަށް ވެސް ވަނީ ގޮވާލައްވާފައެވެ. އަދި މިނިސްޓަރު ވަނީ ދާޚިލީ ވުޒާރާ މިހާރު އެކުލަވާލެވިފައިވަނީ ނަތީޖާ ނެރެވޭނެހެން ރައްޔިތުންގެ ރައްކާތެރިކަން ކަށަވަރު ކުރެވޭގޮތަށް ކަމަށް ވެސް ވިދާޅުވެފައެވެ.