ދިވެހި މަސްވެރިންގެ އަގު ވަޒަން ކުރުމަކީ ގައުމީ ވާޖިބެއް ކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

މިއަދު ފާހަގަކުރާ ރާއްޖޭގެ މަސްވެރިންގެ ދުވަހުގެ މުނާސަބާއި އެފަރާތްތަކަށް ދުވަހުގެ ތަހުނިޔާ ފޮނުއްވުމަށް 'އެކްސް' ގައި ކުރެއްވި ޕޯސްޓުގައެވެ.

އެ ޕޯސްޓުގައި ރައީސް ވިދާޅުވެފައިވަނީ އަތްވާއި ވާރޭގައި ދުވާލާއި ރޭގަނޑު ބިޔަ ކަނޑުތަކުގައި ދިވެހި މަސްވެރިން ކުރާ ހިންމަތުގެ އަގު އިހްތިރާމާއެކު ވަޒަންކުރުމަކީ ގައުމީ ވާޖިބެއް ކަމަށެވެ.

ރާއްޖޭގައި މަސްވެރިންގެ ދުވަހުގެ ގޮތުގައި ފާހަގަކުރަމުން އަންނަނީ ކޮންމެ އަހަރެއްގެ ވެސް ޑިސެމްބަރ 10 ވަނަ ދުވަހެވެ.

މިއަހަރުގެ މި ދުވަސް ފާހަގަކުރުމަށް ފިޝަރީޒް މިނިސްޓްރީން ގެންދަވަނީ ގިނަ ހަރަކާތްތަކެއް ރާވައި، ހިންގަމުންނެވެ. އެގޮތުން 'ރަހަވަރު' ގެ ނަމުގައި ކެއްކުމުގެ މުބާރާތެއް ވަނީ ބާއްވާފައެވެ. މިފަދަ މުބާރާތެއް ސްކޫލު ކުދިންނަށް ހުޅުވާލައި، އަދި ވީހާވެސް ގިނަ ބަޔަކަށް ބައިވެރިވެވޭގޮތަށް އަންނައަހަރު ބޭއްވުމަށް ވެސް ދަނީ ތައްޔާރުވަމުންނެވެ.

މިއަހަރުގެ މަސްވެރިންގެ ދުވަހުގެ ރަސްމީ ޖަލްސާ ބޭއްވުމަށް ހަމަޖެހިފައިވަނީ މާލޭގައެވެ.