އެމްޑީޕީގެ ޗެއަރޕާރސަން ފައްޔާޟު އިސްމާއީލުގެ މައްސަލަ ތަހްގީގުކޮށް ފިޔަވަޅު އެޅުމަށް ގޮވާލައި، ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅައިފިއެވެ.

މިއީ ރައީސުލްޖުމްހޫރިއްޔާ އާންމުންނަށް އަނިޔާވެރިވުމުން އާންމުން ކުޅޭނީ ތާރީހުގެ ފޮތްތަކުން ކަމަށާއި ރާއްޖޭގެ ފުރަތަމަ ރައީސް މުހައްމަދު އަމީން ދީދީ އަށް ހެދިހެން ރައީސް ޑރ. މުހައްމަދު މުއިއްޒަށް ހަދަން ޖެހިދާނެ ކަމަށް ފައްޔާޟު ވިދާޅުވުމުން މިލަންދޫ ދާއިރާގެ މެންބަރު ހަސަން މުފީދު ހުށަހެޅުއްވި ކުއްލި މައްސަލައެކެވެ.

އެ މައްސަލައިގައި އޭނާ ވަނީ ރައީސަށް ހަދަން ޖެހޭނީ އަމީނަށް ހެދިގޮތަށް ކަމަށް ބުނެ އެމްޑީޕީން ދެއްކި ވާހަކަތަކަކީ ޓެރަރިޒަމްގެ ޢަމަލެއް ހިންގުމަށް ހިތްވަރުދޭ ކަމެއްކަން ސާފުކޮށް ފެންނަން އެބައޮތް ކަމަށެވެ. އަދި މިއީ އެ ގާނޫނުގައިވާ ގޮތުން ކުށެއް ކަމަށެވެ.

މީގެއިތުރުން އެމްޑީޕީން މި ވާހަކަތައް ދައްކާފައިވަނީ ވަކި ފިކުރެއް ކުރިއަރުވައި އާންމުންގެ ބައެއްގެ މެދުގައި ބިރުވެރިކަން އުފެއްދުމަށާއި އެހެން މީހެއްގެ ފުރާނައަށް ނުރައްކަލެއް ކުރިމަތިކުރުވުމުގެ މަގްސަދުގައި ކަމަށް ވެސް މެމްބަރު މުފީދު ވަނީ ވިދާޅުވެފައެވެ.

އެހެންކަމުން ސަރުކާރުގެ ސަމާލުކަމަށް މި މައްސަލަ ގެނެސް މި މައްސަލަ ތަހްގީގުކޮށް ކަމާބެހޭ ފަރާތްތަކުން ފިޔަވަޅު އެޅުމަށް އޭނާ ގޮވައި، މައްސަލަ ހުށަހެޅުމުން އެ މައްސަލައަށް ބަހުސްކުރަން ފެނޭތޯ ވޯޓަށް އެހުމުން، ވޯޓުގައި ބައިވެރިވި 53 މެންބަރުންގެ ތެރެއިން 44 މެންބަރުން ވޯޓު ދެއްވީ ފެންނަ ކަމަށެވެ. އަދި ނުފެންނަ ކަމަށް އަށް މެންބަރަކު ވޯޓުދެއްވިއިރު، ވަކިކޮޅަކަށް ވޯޓުނުދެއްވާ އިންނެވީ އެންމެ މެމްބަރެކެވެ.