ކޮޅުމަޑުލު ވޭމަންޑުގައި ދީނީ ނަސޭހަތް ދިނުމުގެ ޕްރޮގްރާމެއް ކުރިއަށް ގެންގޮސްފިއެވެ.

މިއީ ވޭމަންޑު ޒުވާނުންގެ ގުޅުމާއި ސަލަފް ޖަމިއްޔާ ގުޅިގެން ކުރިއަށް ގެންދިޔަ ޕްރޮގްރާމެކެެވެ.

"އޮއިވަރު' އަށް މައުލޫމާތު ދެއްވަމުން އެ ޖަމިއްޔާގެ ރައީސް އަހްމަދު ޝައުކަތު ވިދާޅުވީ މި ޕްރޮގްރާމު ކުރިއަށް ގެންދިޔައީ މި ޑިސެމްބަރ މަހުގެ 6 އަދި 7 ވަނަ ދުވަހު ކަމަށާއި ދީނީ ނަސޭހަތް ދެއްވީ ޖަމިއްޔަތުއްސަލަފްގެ ޝޭހް މުޖަތަބާ ޙަމީދު ކަމަށެވެ.

ޝައުކަތު ވިދާޅުވީ އެރަށު ސްކޫލުގެ ދަރިވަރުންނަށާއި އާންމުންނަށް ކުރިއަށް ގެންދިޔަ މި ޕްރޮގްރާމަށް ބޮޑު ތަރުހީބެއް ލިބުނު ކަމަށާއި މުސްތަގުބަލުގައި މިފަދަ އިތުރު ހަރަކާތްތައް ބޭއްވުމަށް ނިންމާފައިވާ ކަމަށެވެ. އަދި މި ޕްރޮގްރާމަށް ރައްޔިތުންގެ ފަރާތުން ލިބުނު ތަރުހީބަށް ވަނީ ޝުކުރުއަދާކުރައްވާފައެވެ.

އޭނާ އިތުރަށް ވިދާޅުވީ ސުވާލާއި ޖަވާބު ވެސް ހިމަނައިގެން ކުރިއަށްގެންދިޔުމުން މީހުންގެ ޝައުގުވެރިކަން އިތުރުވި ކަމަށާއި މިފަދަ ހަރަކާތެއް ހިންގުމުގެ މައިގަނޑު މަގްސަދަކީ ސްކޫލު ދަރިވަރުންނާއި ރައްޔިތުންގެ ހިތްތަކުގައި ދީނީ ހޭލުންތެރިކަން އިތުރުކުރުވައި، މާތްވެގެންވާ އިސްލާމް ދީނަށް ލޯބި ޖެއްސުން ކަމަށެވެ.