ރައީސް ޑރ. މުޙައްމަދު މުޢިއްޒުގެ ވައުދުފުޅާ އެއްގޮތަށް ރާއްޖެއިން ބޭރުގެ 3 ހޮސްޕޮިޓަލުން އާސަންދަ ހަމަޖެއްސުމަށް ސޮއި ކޮށްފިއެވެ.

ދިވެހި ރައްޔިތުންނަށް ބޭސްފަރުވާގެ ހިދުމަތް ފުޅާކޮށް، އާސަންދައިން ދެމުންދާ ހިދުމަތް ތަރައްގީކުރުމަށް އެމަނިކުފާނު ވެވަޑައިގެންނެވި ވައުދުފުޅާއި އެއްގޮތަށް އާސަންދަ ސްކީމުގެ ދަށުން ހިދުމަތް ދިނުމަށް ސޮއިކޮށްފައިވަނީ ޔޫއޭއީ އާއި ތައިލެންޑުގެ ދެ ހޮސްޕިޓަލަކާއެކުގައެވެ.

އެގޮތުން ހިދުމަތް ފެށުމަށް ޔޫއޭއީގެ ބުރްޖީލް މެޑިކަލް ސިޓީ އާއި ބެންކޮކްގެ ވޯރލްޑް މެޑިކަލް ހޮސްޕިޓަލާއެކު އެއްބަސްވުންތަކުގައި އާސަންދައިގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު އައިމިނަތު ޒީނިއާއެވެ.

މި އެއްބަސްވުންތަކުގެ ދަށުން އަންނަ އަހަރުގެ ޖެނުއަރީ މަހުގެ 15 އިން ފެށިގެން ކަނޑައެޅޭ އުސޫލެއްގެ ތެރެއިން އެ ހޮސްޕިޓަލްތަކަށް ފަރުވާއަށް ފޮނުވަން ފަށާނެ ކަމަށް އާސަންދަ ކުންފުނިން ވަނީ ވިދާޅުވެފައެވެ.

އާސަންދަ ސްކީމްގެ ދަށުން ރާއްޖޭން ބޭރަށް ބޭސްފަރުވާއަށް މިވަގުތު ފޮނުވަމުންދަނީ އިންޑިއާ އާއި ސްރީލަންކާއަށެވެ.

އާސަންދައިގެ ދަށުން ހިދުމަތް ލިބޭ ގައުމުތައް އިތުރުކުރުމަށް ސަރުކާރުން މަސައްކަތްކުރައްވަމުން ގެންދަވާއިރު، އާސަންދަ ނިޒާމު ވެސް ހަރުދަނާ ކުރުމަށް ގިނަ މަސައްކަތްތަކެއް ގެންދަވަނީ ކުރައްވަމުންނެވެ.