އެމްޑީޕީ އޮތީ ރައްޔިތުންނާ އެކީގައި ކަމަށާއި ހައްގުތައް ހޯދަައިދިނުމަށް ކުރަން ޖެހޭ ހުރިހާ ކަމެއް ކުރަން ތައްޔާރަށް އޮތް ކަމުގައި ކުރީގެ ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ "ގާނޫނު އަސާސީގެ ދިފާއުގައި" ނަމުގައި ކާނިވާ ސަރަހައްދުގައި އެމްޑީޕީން ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ޑިސެމްބަރ 10 ވަނަ ދުވަހުގެ ރޭ ބޭއްވި މި ޖަލްސާގައި އެމަނިކުފާނު ވިދާޅުވީ ރައްޔިތުން ފަހަތަށް ނުޖެހި ނުކުންނަންވީ ކަމަށާއި އޭރުން ރައްޔިތުންގެ އަޑު އަހަން މަޖުބޫރުވާނެކަމަށެވެ.

"އަޅުގަނޑުމެން ނުވާނެ ފަހަތަށް ޖެހިގެންނެއް. ބާރު އޮތީ ރައްޔިތުންގެ އަތް މަތީގައި. އެމްޑީޕީ މިއަދު މިއޮތީ ރައްޔިތުންނާ އެކީގައި މި ހައްގުތައް ހޯދަައިދިނުމަށް ކުރަން ޖެހޭ ހުރިހާ ކަމެއް ކުރަން ތައްޔާރަށް." އެމަނިކުފާނު ވިދާޅުވިއެވެ.

މީގެއިތުރުން ރާއްޖޭގައި މިހާރު ޢަމަލު ކުރަމުން އަންނަ ފެހި ގާނޫނު އަސާސީ ހޯދީ އެތައް ބައެއްގެ ގުރުބާނީއަކާއި އެތައް ބުރަ މަސައްކަތަކާ އެކުގައި ކަމަށާއި ފެހި ގާނޫނު އަސާސީ އަށް ބަދަލު ކުރުމުގެ މަސައްކަތަކީ ރައްޔިތުންގެ ބާރު ހިނގާ ވެރިކަމެއް ގެނައުމަށް ކުރި ބުރަ މަސައްކަތް ކަމަށެވެ.

ހަމަމިއާއެކު މި ސަރުކާރު ވެރިކަމަށް އައުމަށް ފަހު އެންމެ ފުރަތަމަ ހަމަލާ ދީފައި ވަނީ ނޫސްވެރިންނަށްކަން ފާހަގަކުރައްވައި، ނޫސްވެރިންނަށް ބިރުދައްކައި ނޫސްތައް ބަންދުކުރަން މަސައްކަތް ކުރި ކަމަށް ރައީސް ސާލިހު ވިދާޅުވިއެވެ.

އެހެންނަމަވެސް އެ ދުވަހު ނޫސްވެރިން އެކަމާ ކެރިގެން ކުރިމަތިލުމުގެ ނަތީޖާއަކީ ސަރުކާރު ފަހަތަށް ޖެހުން ކަމަށް ވިދާޅުވިއެވެ. އަދި ކުރިމަތިން ފެންނަމުންދާ ވިލާގަނޑުން ފެންނަނީ ކުރިއަށް އޮތީ ވަރަށް ބަނަ، ބިރުވެރި، ނާމަން އަދި ދަތި އުނދަގޫ ދުވަސްތަކެއްގެ ގޮތުގައި ކަމަށް ރައީސް ސޯލިހް ސިފަފުޅު ކުރެއްވިއެވެ.

ރައީސް ސާލިހު ވިދާޅުވީ މިހާރުން މިހާރަށް މަސައްކަތްތަކެއް ކޮށް، އަވަސް މުސްތަގްބަލެއްގައި ފިޔަވަޅުތަކެއް އަޅަން ޖެހޭ ކަމަށާއި އެހެންނޫންނަމަ، އަނިޔާވެރި ދުވަސްތަކަކާ ކުރިމަތިލާން ޖެހިދާނެ ކަމަށެވެ. އަދި އެމްޑީޕީން ނިކުމެ މިތިބީ އަދުގެ ޒުވާނުންނާއި ދުވަސްވީ މީހުން މި އަނިޔާވެރިކަމުން ސަލާމަތް ކުރުމަށް ކަމަށް ވެސް ރައީސް ސާލިހު ވަނީ ވިދާޅުވެފައެވެ.