މޯލްޑިވްސް މީޑިއާ ކައުންސިލް (އެމްއެމްސީ) އިން ހިންގި ސްޓޫޑަންޓް ޖާނަލިޒަމް ޕްރޮގްރާމް (އެސްޖޭޕީ) ޕްރޮގްރާމުގެ ދަރިވަރުންނަށް އިންޓަރންޝިޕް ހަވާލުކޮށްފިއެވެ.

ވިލާ ކޮލެޖު ހޯލުގައި ޑިސެމްބަރ 11 ވަނަ ދުވަހު ބޭއްވި ހާއްސަ ހަފުލާއެއްގައި އިންޓަރންޝިޕަށް ހޮވުނުކަމުގެ ލިޔުން ހަވާލުކޮށްފައިވަނީ މަސައްކަތުގެ މާހައުލަށް ނުކުމެ، ތަޖުރިބާ ހޯދުމަށް ޝައުގުވެރިކަން ފާޅުކުރި ދަރިވަރުންނަށެވެ. އެ ދަރިވަރުންނަށް ލިޔުން ހަވާލުކޮށްދެއްވީ އެސްޖޭޕީ ޕްރޮގްރާމުގެ ހެޑް މޫސާ ރަޝީދުއެވެ.

އެސްޖޭޕީ ޕްރޮގްރާމުގެ ދަރިވަރުންނަށް އިންޓަރޝިޕް ދިނުމަށް ބޭނުންވާ މީޑިއާތަކަށް އެ ފުރުސަތު ހުޅުވައިލީ ނޮވެމްބަރ މަހުއެވެ. އަދި މި ފުރުސަތަށް ޓީވީ ސްޓޭޝަންތަކާއި އޮންލައިން މީޑިއާތަކުން ވަނީ ހުށަހަޅާފައެވެ.

އެމްއެމްސީން ހާމަކުރައްވާފައިވާ ގޮތުގައި މި ޕްރޮގްރާމުގައި ބައިވެރިވެފައިވާ ދަރިވަރުންގެ ތެރެއިން 40 ދަރިވަރުން އިންޓަރންޝިޕަަށް ޝައުގުވެރިކަން ފާޅުކޮށްފައިވާ ކަމަށެވެ.

އެސްޖޭޕީ ޕްރޮގްރާމަކީ ސްކޫލު ނިންމާ ދަރިވަރުން ނޫސްވެރިކަމުގެ ދާއިރާ އަށް ވައްދައި، އެ ދާއިރާގައި ޒުވާން ޖީލެއް ބިނާކުރުމުގެ މަގްސަދުގައި އެމްއެމްސީގެ މި ހިނގާ 7 ވަނަ ދައުރުގައި ފެށި ޕްރޮގްރާމެކެވެ. މި ޕްރޮގްރާމު މާލެ ސަރަހައްދުގެ އިތުރުން އަތޮޅުތަކުގައި ވެސް ވަނީ ހިންގާފައެވެ.

މި ޕްރޮގްރާމުގެ މުދައްރިބުންގެ ގޮތުގައި ހަރަކާތްތެރިވެފައިވަނީ ނޫސްވެރިކަމުގެ އެކި ދާއިރާގެ ފުންނާބު އުސް ފަރާތްތަކުންނެވެ. އަދި ދަރިވަރުންނަށް ވަނީ ތިއަރީބަޔާއި ޕްރެކްޓިކަލް ކިޔަވައިދީފައެވެ.