ފެނަކަ ކޯޕަރޭޝަންގެ މެނޭޖިންގ ޑިރެކްޓަރުގެ މަގާމުގައި ހުންނެވި މުއާޒް މުޙައްމަދު ރަޝީދު އެ މަގާމުން އިސްތިއުފާދެއްވައިފިއެވެ.

އޭނާ ވަނީ އިސްތިއުފާދެއްވިކަން ހާމަކުރައްވައި، ރައީސް ޑރ. މުޙައްމަދު މުޢިއްޒު އަށް ފޮނުއްވި ސިޓީ މީސްމީޑިއާގެ 'އެކްސް' ގައި އާންމު ކުރައްވާފައެވެ.

އެ ސިޓީގައި މުއާޒު ވިދާޅުވެފައިވަނީ ކުންފުނިތަކަކީ އުސޫލެއްގެ ގޮތުން އެ ކުންފުނިތަކަށް ލިބޭ އާމްދަނީއަކުން ހިންގުން ބައްޓަންކުރަންޖެހޭ ތަންތަނަށްވީ ނަމަވެސް، ފެނަކަ ވެއްޓިފައިވާ މާލީ ހާލަތުން އެކަން އެގޮތަށް ކުރުމަކީ، ވުން އެކަށީގެން ނުވާ ކަމެއްކަމަށެވެ.

މުއާޒު ވިދާޅުވެފައިވަނީ ކުންފުނިން ހިދުމަތް ފޯރުކޮށްދޭ ގިނަ ރަށްރަށުގެ ކަރަންޓާއި ފެނާއި ނަރުދަމާގެ ހިދުމަތްތައް ފާއިތުވީ އަހަރުތަކުގެ ތެރޭގައި އެކަށީގެންވާ ގޮތެއްގައި މެއިންޓަނަންސްކޮށް ބެލެހެއްޓިފައި ނުވާ ކަމަށެވެ. އަދީ އޭގެސަބަބުން، ކުރިން އޮތް ބެކްލޮގް އެއްކޮށް ރަނގަޅު ކުރެވިފައި ނުވުމާއި، ކުންފުންޏާ ހަވާލުވެވަޑައިގެންނެވިއިރު، ދަރަނީގެ ގޮތުގައި 4.3 ބިލިއަން ރުފިޔާ އޮތްކަމަށެވެ.

މީގެއިތުރުން ކުންފުންޏަށް ބޭނުންވާ އަދަދަށްވުރެ އެތައް ގުނައެއް އިތުރަށް ވަޒީފާ ހަމަޖައްސަން ޖެހުމާއި ކުންފުނި ރައިޓް ސައިޒް ކުރުމަށް އެކަށީގެންވާ އެއްބާރުލުމެއް ކަމާ ގުޅުންހުރި އިދާރާތަކުން ނުލިބޭކަން އެ ސިޓީގައި ވަނީ ފާހަގަކޮށްފައެވެ. އަދި ކުންފުންޏަށް ލިބޭ އާމްދަނީއަށްވުރެ ކުރަން ޖެހިފައިވާ ހަރަދު އިންތިހާއަށް އިތުރުވެފައިވުމަކީ ކުންފުންޏަށް ލިބޭ އާމްދަނީން އެ ކުންފުނީގެ ހިންގުން ބައްޓަންނުކުރެވޭ ސަބަބެއްކަން ވަނީ ފާހަގަކުރައްވާފައެވެ.

މުއާޒު އިތުރަށް ވިދާޅުވެފައިވަނީ އެ ކުންފުނީގެ އެމްޑީގެ މަގާމަށް އައްޔަންކުރި ދުވަހުން ފެށިގެން މިއަދާ ހަމައަށް ވެސް މަސައްކަތްކުރީ އިހްލާސްތެރިކަމާއެކު، ހަވާލުކުރެވިފައިވާ މަސްއޫލިއްޔަތު އެންމެ ފުރިހަމަ ގޮތުގައި އަދާކުރުންމަތީގައި ކަމަށެވެ.

ފެނަކަ ކޯޕަރޭޝަންގެ މެނޭޖިންގ ޑައިރެކްޓަރގެ މަގާމުން އިސްތިއުފާ ދީފިން. pic.twitter.com/TmadBgkvqw

— Muaz Mohamed Rasheed (@muazmr) December 23, 2024