ހައުސިންގ މިނިސްޓްރީގައި ހިނގި އަލިފާނުގެ ހާދިސާގައި ގެދޮރުވެރިޔާ ސްކީމާ ގުޅޭ އެއްވެސް މައުލޫމާތެއް ނުގެއްލޭކަަމަށް އެ މިނިސްޓްރީން ހާމަކޮށްފިއެވެ.

އެ މިނިސްޓްރީން މިފަދައިން ވިދާޅުވީ އަލިފާން ރޯވުމާއެކު އެއީ ސިޔާސީ ކަމަކަށް ހެދުމަށް ބައެއް ފަރާތްތަކުން ވާހަކަތައް ފަތުރަމުންދާތީ ނެރުއްވި ނޫސްބަޔާނެގައެވެ.

އެ ބަޔާނުގައި ވަނީ ގެދޮރުވެރިޔާ ސްކީމާ ގުޅޭ ހުރިހާ މައުލޫމާތާއި ލިޔުންތަކަކީ އެ މިނިސްޓްރީގެ ކްލައުޑް ހޯސްޓިންގ ގައި ޑިޖިޓަލްކޮށް ބަލަހައްޓާ މައުލޫމާތުތަކެއް ކަމަށެވެ. އެހެންވެ، ހާދިސާގެ ސަބަބުން އެ މައުލޫމާތުތަކަށް އެއްވެސް އަސަރެއް ނުކުރާނެ ކަމަށް ވަނީ ވިދާޅުވެފައެވެ.

މީގެއިތުރުން އެ މިނިސްޓްރީ އާއި ކޮންސްޓްރަކްޝަން މިނިސްޓްރީ އަދި އެންވަޔަރްމެންޓް މިނިސްޓްރީގައި ވެސް މި ހާދިސާގެ ސަބަބުން އަލިފާން ރޯވެފައިވީނަމަވެސް އެއްވެސް މުވައްޒަފަކަށް އަނިޔާއެއްވެފައި ނުވާކަމަށް ވިދާޅުވެފައި ވެއެވެ.

ހައުސިންގ މިނިސްޓްރީން ވަނީ މި ހާދިސާއާ ގުޅިގެން ސަލާމަތާއި ރައްކާތެރިކަމަށްޓަަކައި ކުރެވެންހުރި ކަންކަމާއި ގުޅޭގޮތުން ކަމާގުޅޭ ފަރާތްތަކާ މަޝްވަރާކުރަމުންދާކަމަށް ވެސް ވިދާޅުވެފައެވެ.