2034 ވަނަ އަހަރު ފީފާ ވަރލްޑް ކަޕް ބޭއްވުމުގެ ބީލަން ސަޢޫދީ ޢަރަބިއްޔާ އިން ކާމިޔާބު ކޮށްފައިވާތީ، ރައީސް ޑރ. މުޙައްމަދު މުޢިއްޒު، އެގައުމުގެ އިސްވެރިންނަށް މަރުހަބާ ދަންނަވައިފިއެވެ.

އެމަނިކުފާނު މަރުހަބާ ދަންނަވާފައިވަނީ މާތްވެގެންވާ ދެ ޙަރަމްފުޅުގެ ޚާދިމް އަދި ސަޢޫދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒް އާލް ސަޢޫދަށާއި، ސަޢޫދީ ޢަރަބިއްޔާގެ ވަލީޢަހްދު އަދި ބޮޑުވަޒީރު މުޙައްމަދު ބިން ސަލްމާން ބިން ޢަބްދުލްޢަޒީޒް އާލް ސަޢޫދަށް އަދި އެ ގައުމުގެ ރައްޔިތުންނަށް މަރުހަބާ ދަންނަވާ މީސްމީޑިއާގައި ކުރެއްވި ޕޯސްޓެއްގައެވެ.

އެ ޕޯސްޓުގައި ވަނީ މި ކާމިޔާބީއަކީ އެގައުމުގެ ހައިބަތާއި ގަދަރު ދުނިޔޭގައި އުފުލެމުންދާ ކަމުގެ ހެއްކެއް ކަމަށް ވިދާޅުވެފައެވެ. އަދި ބައިނަލްއަގްވާމީ މައިދާނުގައި އެ ގައުމުގެ ސާބިތުކަމާއި، ހަރުދަނާ ސިޔާސަތާއި އިސްނެގުމުގެ ދިރިހުރި މިސާލެއް ކަމަށްވެސް ވިދާޅުވެފައި ވެއެވެ.

މީގެއިތުރުން މިއީ ސަޢޫދީ އާއި އަރަބި ކަރަޔަށާއި މުޅި އިސްލާމީ އުންމަތަށް ލިބު ނު ފަޚުރެއްކަމުގައިވެސް ފާހަގަކުރައްވާފައިވެއެވެ.

ރައީސްގެ މެސެޖު ނިންމަވައިލައްވަމުން، 2034 ވަނަ އަހަރު ސަޢޫދީ ޢަރަބިއްޔާގައި އޮންނަ ދުނިޔޭގެ ތަށްޓަށް ކުޅޭ ފުޓްބޯޅަ މުބާރާތަކީ ކުޅުންތެރިންގެ މޮޅުކަން ދައްކުވައިދޭ ވަރލްޑް ކަޕަކަށް ވުމަށް ވަނީ އެދިވަޑައިގެންފައެވެ. އަދި އެއްބައިވަންތަކަމާއި ސަގާފަތާއި ފަންނިއްޔާތާއި އީޖާދުތަކުގެ ރޮނގުން ވެސް ދުނިޔެއަށް މުޅީން އައު ކަންތައްތަކެއް ދައްކުވައިދޭނެ މުބާރާތަކަށް ވާނެކަމަށް އުންމީދު ކުރައްވާ ކަމަށް ވިދާޅުވިއެވެ.