ހައުސިންގ މިނިސްޓްރީ ހުރި އިމާރާތުގައި ޑިސެމްބަރ 12 ވަނަ ދުވަހު ހިނގި އަލިފާނުގެ ހާދިސާ އާ ގުޅިގެން ވަގުތީ ހިޔާތަކަށް މީހުން ބަދަލުކުރުމުގެ މަސައްކަތް ކުރިއަށްދާ ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ވިދާޅުވެއްޖެއެވެ.

އެ އޮތޯރިޓީން ވިދާޅުވީ އެ ހާދިސާ އާ ގުޅިގެން އެ ހާދިސާގެ ސަބަބުން އެ ސަރަހައްދުގައި ހުރި ގެތަކަށް ވަނީ އެކިވަރުގެ ގެއްލުންތައް ލިބިފައެވެ.

އެގޮތުން 3 އިމާރާތެއްގެ 7 ގޭބިސީއަކުން 29 މީހުން ވަގުތީ ހިޔާތަކަށް ބަދަލުކުރުމުގެ މަސައްކަތް ކުރަމުންދާކަމަށް ވަނީ ވިދާޅުވެފައެވެ. އަދި އެއީ 15 ފިރިހެނުންނާއި 14 އަންހެނުން ކަމަށް ވެސް ވިދާޅުވިއެވެ.

އެންޑީއެމްއޭ އިން ވިދާޅުވީ ވަގުތީ ހިޔާތަކަށް ބަދަލުކުރަނީ މ. ލޯކަށިގެ، މ. ކުދިމާވިލާ، އަދި މ. ލޫބިޔާ ގޭގެ މީހުންނެވެ.

މި ހާދިސާއާ ގުޅިގެން އެ އިދާރާ އިން ވަނީ ސޯޝަލް ސެންޓަރުގައި އިމަޖެންސީ އިވެކުއޭޝަން ސެންޓަރެއް ގާއިމްކޮށް، އެހީ ބޭނުންވާ މީހުންނަށް އެހީތެރިވުމަށް ސައިކޯ ސޯޝަލް ސަޕޯޓްގެ ހިދުމަތްތައް ވެސް އަންނަނީ ފޯރުކޮށްދެމުންނެވެ.

އެންޑީއެމްއޭ އިން ހާމަކުރައްވާފައިވާ ގޮތުގައި މި ހާދިސާ އާ ގުޅިގެން 50 އަށްވުރެ ގިނަ މީހުންނަށް އެހީތެރިކަން ބޭނުންވާކަމަށް މިހައިތަނަށް ފާހަގަކޮށްފައިވާ ކަމަށެވެ. އެމީހުންނަށް ބޭނުންވާ ޒަރޫރީ ބައެއްކަންކަން ހަމަޖައްސާދީފައިވާ ކަމަށާއި ބައެއް މީހުން އެމީހުންގެ އާއިލާގެ ގެތަކަށް ބަދަލުވާން ބޭނުންވުމުން އެކަމުގެ ހުއްދަވެސް ދީފައިވާކަމަށް ވެސް އެ އޮތޯރިޓީން ވިދާޅުވެއެވެ.