މޯލްޑިވްސް މީޑިއާ ކައުންސިލް (އެމްއެމްސީ) އަށް އޮންލައިންކޮށް ޝަކުވާ ހުށަހެޅޭ ގޮތް ހަދައިފިއެވެ.

އެމްއެމްސީން މިކަން ހާމަކުރެއްވީ އެ އިދާރާ އިން ހިންގި ސްޓޫޑަންޓް ޖާނަލިޒަމް ޕްރޮގްރާމް (އެސްޖޭޕީ) ޕްރޮގްރާމުގެ ދަރިވަރުންނަށް އިންޓަރންޝިޕް ހަވާލުކުރުމަށާއި 7 ވަނަ ދައުރުގެ ކާމިޔާބީ ފާހަގަކުރުމަށް ބޭއްވި ހަފުލާގައެވެ.

ވިލާ ކޮލެޖު ހޯލުގައި ޑިސެމްބަރ 11 ވަނަ ދުވަހު ބޭއްވި ހާއްސަ ހަފުލާގައި އެމްއެމްސީގެ 7 ވަނަ ދައުރުގެ ކާމިޔާބީތައް ފާހަގަކުރަމުން ހާމަކޮށްފައިވަނީ މީޑިއާތަކާއި ނޫސްތަކާ ގުޅޭ ޝަކުވާތައް އޮންލައިންކޮށް މިހާރުހުށަހެޅޭނެ ކަމަށެވެ.

އެގޮތުން އެފަދަ ޝަކުވާތައް ހުށަހެޅޭނީ one.gov.mv މެދުވެރިކޮށް ކަމަށާއި މިކަމުގެ ސަބަބުން ޝަކުވާ ހުށަހެޅުމުގެ މަސައްކަތް ފަސޭހަވެ، އަވަސްވެގެންދާނެކަން ވަނީ ފާހަގަކޮށްފައެވެ.

މީޑިއާ ކައުންސިލަކީ ރާއްޖޭގެ މީޑިއާތަކުގެ މިނިވަންކަން ކަށަވަރުކޮށް، ޒިންމާދާރު ނޫސްވެރިކަމެއް ކުރިއެރުވުމަށް މަސައްކަތްކުރުމަށް 2010 ވަނަ އަހަރު އުފައްދާފައިވާ މިނިވަން މުވައްސަސާއެކެވެ.