އެމްޑީޕީ މެމްބަރުން އިސްލާމް ދީން ގަބޫލު ނުކުރާކަމަށް މަޖިލިސް މެމްބަރަކު ވިދާޅުވި މައްސަލަ ބަލަން އެ ޕާޓީން ގޮވާލައިފިއެވެ.

އެ ޕާޓީގެ ރައީސް އަދި ކުރީގެ ފޮރިން މިނިސްޓަރ ޢަބްދުﷲ ޝާހިދު ކުރައްވާފައިވާ ޓްވީޓެއްގައި މިފަދައިން ގޮވާލެއްވީ، ޑިސެމްބަރ 12 ވަނަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ވިލިމާލެ ދާއިރާގެ މެމްބަރު މުހައްމަދު އިސްމާއިލް ދެއްކެވި ވާހަކައަކާއި ގުޅިގެންނެވެ.

ކީރިތި ގުރުއާނުގެ އާޔަތްތަކަށް ބަދަލުގެނެސްގެން ޕީއެސްއެމްގެ ޗެނަލްތަކުން ދައްކަމުންދާ ކަމަށް ބުނެ، އެމްޑީޕީގެ ކެންދޫ ދާއިރާގެ މެންބަރު މައުރޫފް ޒާކިރު، ރައްޔިތުންގެ މަޖިލީހުގެ ޖަލްސާއަށް ހުށަހެޅުއްވި ކުއްލި މައްސަލައަށް ވާހަކަދައްކަވަމުން މުހައްމަދު އިސްމާއިލް ވަނީ އެމްޑީޕީ ކިޔައިފި ނަމަ، އެއީ ލާދީނީ ބައެއް ކަމަށެވެ. އަދި އެއީ ކީރިތި ގުރުއާނާއި އިސްލާމް ދީން ގަބޫލުކުރާ ބައެއް ނޫން ކަމަށެވެ.

އެހެންނަމަވެސް ފަހުން އޭނާ ވަނީ އެކަމަށް މައާފަށް އެދިވަޑައިގެންފައެވެ.

މެމްބަރު މުޙައްމަދު އިސްމާއިލްގެ މިވާހަކަތަކަށް އިޝާރާތް ކުރައްވައި، ޝާހިދު ވަނީ ދިވެހިރައްޔިތުންގެ ޑިމޮކްރެޓިކް ޕާޓީގެ މެންބަރުންނަކީ އިސްލާމްދީން ގަބޫލުކުރާ ބައެއްނޫން ކަމަށް ވިދާޅުވެ، ރައްޔިތުންގެ މަޖިލީހުގައި މެންބަރަކު ދެއްކެވި ވާހަކަ ކުށްވެރިކުރައްވާފައެވެ.

"ޤާނޫނުއަސާސީގެ 9 ވަނަ މާއްދާގައި ދިވެހިރައްޔިތް ކަނޑައަޅައި ބަޔާންކޮށް، މުސްލިމަކަށް މެނުވީ ދިވެހިރައްޔިތަކަށް ނުވެވޭނެކަން ކަނޑައަޅައިފައިވާތީ ކޮންމެ ދިވެހިރައްޔިތަކީވެސް މުސްލިމެކެވެ. ދިވެހިރާއްޖޭގެ ގާނޫނުލްއުގޫބާތުގެ 124 ވަނަ މާއްދާ ބުނާގޮތުން، މުސްލިމަކު ކަނޑައެޅިގެން ކުފުރުގެ އަމަލެއް ނުކުރާހާ ހިނދަކު އެމީހަކީ މުރުތައްދުވެފައިވާ މީހެއްގެ ގޮތުގައި ސިފަކުރުމަކީ ޖިނާއީ ކުށެކެވެ." ޝާހިދު ވިދާޅުވިއެވެ.

މީގެއިތުރުން ދިވެހިރައްޔިތުންގެ ދީނީ އެއްބައިވަންތަކަން ހިމާޔަތް ކުރުމުގެ ގާނޫނުގެ 35 ވަނަ މާއްދާގައި ވާގޮތުން، ދިވެހި ރައްޔިތުންގެ ދީނީ އެއްބައިވަންތަކަން ނަގައިލުމަށް މަސައްކަތް ކުރުމާއި އެ ބާވަތުގެ ވާހަކަދެއްކުމަކީ މަނާ ކަމެއް ކަމުގައި ހަނދާންކޮށްދެއްވިއެވެ. އަދި ދިވެހިރައްޔިތުންގެ ތެރެއިން ގިނަ އަދަދެއްގެ ބަޔަކު ނިސްބަތްވާ ޕާޓީއެއްގެ މެންބަރުންނަކީ، މުސްލިމުން ނޫންކަމަށް ބުނުމަކީ ރައްޔިތުންގެ ތާއީދު ގެއްލި ސިޔާސީގޮތުން ބަލިވާން ފެށުމުން، އެކަން ފޫބެއްދުމަށްޓަކައި ރައްޔިތުން ބައިބައި ކުރުމަށް ދީނީގޮތުން ފިތުނަ އުފެއްދުމަށް ފެށި ކަމެއްކަމުގައި ވެސް ފާހަގަކުރެއްވިއެވެ.

ޝާހިދު ވަނީ ރައްޔިތުންގެ މަޖިލީހުގެ އިމްތިޔާޒާއި ސުލޫކު ކޮމިޓީން މި މައްސަލަ އަވަހަށް ބައްލަވައި، އެކަށީގެންވާ ފިޔަވަޅު އެޅުމަށް ވެސް ގޮވާލާފައެވެ.