ރާއްޖޭގެ އުތުރާއި ދެކުނުގެ ބައެއް ރަށްތަކަށް ކެރީގެ އަސަރު މިއަދު ފޯރާނެ ކަމަށް މެޓް އޮފީހުން ހާމަކޮށްފިއެވެ.

އެ އޮފީހުން ނެރެފައިވާ މޫސުމީ ބުލެޓިންގ ގައި ވަނީ މެދުރާއްޖެތެރޭގައި އާންމުގޮތެއްގައި މޫސުން ރަނގަޅުވާނެކަމަށް ލަފާކޮށްފައެވެ. އަދި ދެކުނުގެ އަތޮޅުތަކުގައި ވައި ޖެހޭނެކަމަށް ލަފާކޮށްފައިވަނީ ހުޅަނގާއި ހުޅަނގުއުތުރުން ގަޑިއަކު 13 މޭލާއި 23 މޭލުގެ ބާރުމިނުގައެވެ.

އެހެން ހިސާބުތަކަށް ފަސް މޭލާއި 15 މޭލާއި ދެމެދުގެ ބާރުމިނުގައި ވައިޖެހޭނެކަމަށް ލަފާކޮށްފައިވާއިރު، ދެކުނުގެ އަތޮޅުތަކުގައި ކަނޑު ގަދަވާނެ ކަަމަށް ލަފާކޮށްފައި ވެއެވެ. ނަމަވެސް އެހެން ހިސާބުތަކުގައި ކަނޑު މަޑުވާނެ ކަމަށް ވަނީ ލަފާކޮށްފައެވެ.

ރާއްޖޭގެ ކަނޑުގެ ރާޅުތައް ދެކުނުގައި ހުންނާނީ ހަތަރު ފޫޓާއި ހަތް ފޫޓުގައި ކަމަށާއި އުތުރާއި މެދުރޢްޖެތެރޭގައި ހުންނާނީ ދެ ފޫޓާއި ހަތަރު ފޫޓުގައި ކަމަށް މެޓް އޮފީހުން ހާމަކުރެއެވެ.