ޑިސެމްބަރ 12 ވީ ބުރާސްފަތި ދުވަހު، ހައުސިންގ މިނިސްޓްރީ ހުރި އިމާރާތުގައި ހިނގި އަލިފާނުގެ ހާދިސާ އާ ގުޅިގެން ދެ ހަފުލާއެއް ބާއްވާ ތާރީހަށް ބަދަލު ގެނެސް، ފަސްކޮށްފިއެވެ.

އެގޮތުން މިއަހަރުގެ މަސްވެރިންގެ ދުވަހުގެ ޖަލްސާ އާއި ރެހެންދި އެވޯޑު ހަފުލާ ވަނީ ފަސްކޮށްފައެވެ.

ފިޝަރީޒް މިނިސްޓްރީން ވިދާޅުވީ ޑިސެމްބަރ 13 ވާ ހުކުރު ދުވަހުގެ ރޭ ދަރުބާރުގޭގައި ބޭއްވުމަށް ހަމަޖެހިފައިވާ މަސްވެރިންގެ ދުވަހުގެ ޖަލްސާ ފަހުގެ ތާރީހަަކަށް ބަދަލުކޮށްފައިވާ ކަމަށެވެ. އަދި މި ޖަލްސާ ބާއްވާނެ އައު ތާރީހު ދައުވަތު އަރުވާފައިވާ ފަރާތްތަކަށް އަންގާނެ ކަމަށެވެ.

މީގެއިތުރުން 10 ވަނަ ރެހެންދި އެވޯޑު ހަފުލާ ވެސް ވަނީ ފަސްކޮށްފައެވެ. މި ހަފުލާ ބޭއްވުމަށް ކުރިން ނިންމާފައިވަނީ ޑިސެމްބަރ 15 ވާ އާދީއްތަ ދުވަހުގެ ރޭ ދަރުބާރުގޭގައެވެ.

އެހެންނަމަވެސް ސޯޝަލް މިނިސްޓްރީން ނެރުއްވި ނޫސްބަޔާނެއްގައި ވަނީ އެ ހަފުލާ ފަސްކޮށްފައިވާ ކަމަށާއި ހަފުލާ ބާއްވާނެ ތާރީހު ފަހުން ހިއްސާ ކުރައްވާނެ ކަމަށެވެ.