މުލަކަތޮޅު ކޮޅުފުށީގައި އައު ޑްރައިވިންގ ލައިސަންސް ޓްރެކެއް ހުޅުވައިފިއެވެ.

މި ޓްރެކް ހުޅުވައިދެއްވީ ޑިސެމްބަރ 12 ވަނަ ދުވަހު ހެނދުނު ބޭއްވި ރަސްމިއްޔާތެއްގައި ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރ އަލީ ނިޝާން އެވެ.

މި އައު ލައިސަންސް ޓްރެކް ހުޅުވުމާއެކު، އެރަށުން 'އޭ' ކެޓަގަރީގެ ޑްރައިވިންގ ލައިސަންސް (ލައިސަންސް ކާޑު) ދޫކުރުމުގެ ހިދުމަތް ފޯރުކޮށްދެވޭނެއެވެ.

މިއީ އަތޮޅުތެރޭގައި މިފަދަ ހިދުމަތެއް ފޯރުކޮށްދިނުމަށް އެޅުނު މުހިންމު ފިޔަވަޅަކަށްވާއިރު، މި ރަސްމިއްޔާތުގައި ބައިވެރިވުމަށް ޓްރާންސްޕޯޓް މިނިސްޓްރީގެ އިސްބޭފުޅުންގެ ޓީމެއް ވަނީ ކޮޅުފުއްޓަށް ގޮސްފައެވެ.

ޑްރައިވިންގ ލައިސަންސް ޓްރެކް ހުޅުވައިދެއްވާ ޑެޕިއުޓީ މިނިސްޓަރ އަލީ ނިޝާން ވިދާޅުވީ މި ހިދުމަތް ފެށުމުން ރަށުގެ ރައްޔިތުންނަށް ވަރަށް ބޮޑު ލުއިފަސޭހައެއް ލިބިގެންދާނެ ކަމަށެވެ. އަދި މާލެއަށް ދަތުރުކޮށް، ވަގުތާއި ހަރަދު ކުރުމަކާ ނުލައި ލައިސަންސް ހެއްދުމުގެ ފުރުސަތު ލިބި، ރައްޔިތުން ކުރަމުން އައި އުއްމީދުތައް ހާސިލުވީ ކަމަށް ވެސް ވިދާޅުވިއެވެ.