ސިއްހީ ނިޒާމު ހަރުދަނާ ކުރުމުގައި ވިސްނަން ޖެހެނީ ހަމައެކަނި ހޮސްޕިޓަލް އެޅުމަށް ނޫން ކަމަށާއި ވިސްނަންޖެހޭނީ ދުޅަހެޔޮ މުޖުތަމައެއް ބިނާކުރަން ކަމުގައި ހެލްތު މިނިސްޓަރ ޢަބްދުﷲ ނާޒިމް އިބްރާހިމް ވިދާޅުވެއްޖެއެވެެ.

އެމަނިކުފާނު މިފަދައިން ވިދާޅުވީ އުނގޫފާރު ރިޖަނަލް ހޮސްޕިޓަލުގައި އެމްއާރުއައިގެ ހިދުމަތް ފެށުމަށް ބުރާސްފަތި ދުވަހުގެ ރޭ ބޭއްވި ރަސްމިއްޔާތުގައެވެ.

މިނިސްޓަރު ވަނީ ރާއްޖޭގައި ޕްރައިމަރީ ހެލްތު ކެއަރ ނިޒާމެއް ގާއިމްކުރުމުގެ ޕްރޮގްރާމެއްް ފަށާފައިވާ ކަމަށް ފާހަގަކުރައްވާފައެވެ. އެ ޕްރޮގްރާމްގެ ދަށުން ސިއްހީ އެކި ކަންކަމާ ބެހޭގޮތުންނާއި ބަލިތަކުން ރައްކާތެރިވެރިވެ ތިބެވޭނެ ގޮތްތަކާ ބެހޭގޮތުން މައުލޫމާތު، ރައްޔިތުންނާ ގާތުން ހިއްސާކުރާނެ ކަމަށް ވިދާޅުވިއެވެ.

މީގެއިތުރުން އެ މަސައްކަތަކީ ރައީސް ޑރ. މުއިއްޒުގެ ވައުދުފުޅެއްކަން ފާހަގަކުރައްވައި، އެ ހޮސްޕިޓަލުގައި އެމްއާރުއައި ހިދުމަތް ދެވެން ފެށުމަކީ އެ ތަރައްގީގެ ފެށުން ކަމުގައި ވިދާޅުވިއެވެ. އަދި އެ ހޮސްޕިޓަލުގެ ވެރިންނާއި ރަށުގެ ރައްޔިތުން، ހޮސްޕިޓަލުގެ ކުރިއެރުމަށް ކުރަމުންދާ މަސައްކަތަށް ވަނީ ޝުކުރު އަދާކުރައްވާފައެވެ.

އުނގޫފާރު ހޮސްޕިޓަލުގައި އެމްއާރުއައިގެ ހިދުމަތާ އެކު، 'ޕްލޭޓްލެޓް ރިޗް ޕްލާޒްމާ' ނުވަތަ ޕީއާރުޕީގެ ހިދުމަތް ވެސް ވަނީ ތައާރަފްކޮށްފައެވެ. ޕީއާރުޕީއަކީ ހަށިގަނޑުގައި ޒަހަމްވެފައި ހުންނަ ޓިޝޫތަކަށް ފަރުވާ ދިނުމަށްދޭ ހިދުމަތެކެވެ.