މުސްލިމުންގެ ކަންތައް އިސްލާހު ވާނީ ކީރިތި ގުރްއާނާއި ރަސޫލާގެ ސުންނަތުގައި ހިފިވަރަކަށް ކަމުގައި ހުތުބާގައި ހަނދާންކޮށްދީފިއެވެ.

ހުތުބާގައި ބުނީ އޭރުން ދެދުނިޔޭގެ އިއްޒަތާއި ޝަރަފް އެކަލާނގެ މުސްލިމުންނަށް ދެއްވާނެ ކަމަށެވެ. އަދި ކީރިތި ގުރުއާނާއި ކީރިތި ރަސޫލާގެ ސުންނަތާއި ދުރުވީ ވަރަކަށް ބާއްޖަވެރިކަން ގެއްލޭނެކަން ވަނީ ހަނދާންކޮށްދީފައެވެ.

ހުތުބާގައި ބުނީ އިސްލާމްދީން ދޫކޮށް، ކާފިރުކަންމަތީ މަރުގަންނަވާ މީހުން އެމީހުން ކުރި ހުރިހައި ޢަމަލެއް ބޭކާރުވެގެން ދާނެ ކަމަށެވެ. އަދި އެމީހުން ދާއިމަށް ދެމި ތިބެން ޖެހޭނެ ތަނަކީ ނަރަކަ ކަމުގައެވެ.

މީގެއިތުރުން އިސްލާމްދީން ނައްތާލުމަށް ކާފިރުން ކުރާ މަސައްކަތްތައް ބަލައި، އެކަމަށް ފަރުވާތެރިވެ ސަމާލުވާން ޖެހޭ ކަމުގައި ވެސް ހުތުބާގައި ވަނީ ބުނެފައެވެ.

"ކީރިތި ޤުރާއާނާމެދު އުފައްދާ ޝުބުހަ" މިމައުޟޫއަށް ހާއްސަ ކޮށްފައިވާ ހުތުބާގައި ދީނުގެ ކަންކަން މޮޅަށް އުނގެނި އަދާވާތްތެރިންގެ ރޭވުންތަކަށް ހޭލައި ތިބެންޖެހޭނެކަން ވެްސ ހަނދާންކޮށްދީފައި ވެއެވެ. އަދި ކާފިރުން މަސައްކަތް ކުރަމުން އަންނަނީ މުސްލިމުން އެމީހުންގެ ދީނާއި ދުރުކުރެވޭތޯ ކަމަށް ވެސް ބުނެފައި ވެއެވެ.

އެހެންނަމަވެސް މުސްލިމުންގެ އަޒުމަކަށް ވާންވާނީ މަރުދުވަހަށް ދާންދެން އިސްލާމް ދީންމަތީ ސާބިތުވެ ތިބުން ކަމުގައި ހުތުބާގައި ބުނެފައި ވެއެވެ.