ރާއްޖެ އިން ޗައިނާ އަށް ކަނޑައަޅުއްވާފައި ހުންނަވާ ސަފީރު ޑރ. ފަޒީލް ނަޖީބް، އެ މަނިކުފާނުގެ ސަފީރު ކަމުގެ ފަތްކޮޅު، ޗައިނާގެ ރައީސް އެކްސަލަންސީ ޝީ ޖިންޕިންގ އަށް އަރުވައިފިއެވެ.

ބެއިޖިންގ ގައި ހުންނަ ގްރޭޓް ހޯލް އޮފް ދަ ޕީޕަލް ގައި ބޭއްވި ހާއްސަ ރަސްމިއްޔާތަށްފަހު، ސަފީރު ވަނީ ރައީސް ޑރ. މުޙައްމަދު މުޢިއްޒު ގެ ފަރާތްޕުޅުންނާއި ދިވެހި ރައްޔިތުންގެ ފަރާތުން ރައީސް ޝީ އަށާއި އެގައުމުގެ ރައްޔިތުންނަށް އެދުންތަކާއި ވެދުމާއި ސަލާން އަރިސްކުރައްވާފައެވެ.

ރައީސް ޝީ ޖިންޕިންގ ވަނީ ރާއްޖެ އިން ޗައިނާ އަށް ކަނޑައަޅުއްވާ ސަފީރުގެ މަގާ ޑރ. ފަޒީލް ނަޖީބް ހަވާލުވެވަޑައިގަތުމުން އެމަނިކުފާނަށް ތަހުނިޔާ ވިދާޅުވެފައެވެ. އަދި ދެގައުމުގެ ދެމެދު އޮތް ގާތްގުޅުން އިތުރަށް ބަދަހިކުރުމުގެ މަސައްކަތުގައި އެމަނިކުފާނުގެ ފުރިހަމަ އެއްބާރުލެއްވުން ލިބިވަޑައިގަންނަވާނެކަން ކަށަވަރުކޮށްދެއްވިއެވެ.

މި ރަސްމިއްޔާތުގައި ސަފީރުގެ އަރިހުގައި އެމަނިކުފާނުގެ އަނބިކަނބަލުން އާމިނަތު ފަރީޝާ ބައިވެރިވެވަޑައިގެންނެވިއެވެ.

ރާއްޖެ އާއި ޗައިނާ ސިޔާސީ ގުޅުން ގާއިމުކުރީ 14 އޮކްޓޫބަރު 1972 ގައެވެ. އެމްބެސެޑަރު ފަޒީލް އަކީ ރާއްޖެ އިން އެގައުމަށް ނޑައެޅި ފަސްވަނަ ސަފީރެވެ.