މި ސަރުކާރުން ކުރާ ހަމައެކަނި ކަމަކީ އެކިއެކި ތާރީހުތައް ރައްޔިތުންނަށް ދީ، ބަހަނާ ދެއްކުން ކަމުގައި ކުރީގެ ރައީސް ޢަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ޕީއެންއެފް އިން ބޭއްވި ފްރަންޓު އޮފީސް ޖަލްސާގައި އެއް ކަމެއްގެ ގޮތުގައި އެމަނިކުފަނު ވަނީ މި އަހަރު ކަމެއްނުވީ ބަޖެޓު އޮތް ގޮތުން ކަމަށް ސަރުކާރުން ވިދާޅުވާ، ވިދާޅުވުމަށް އިޝާރާތް ކުރައްވާފައެވެ.

އެކަމަށް އިޝާރާތްކުރައްވައި، ވިދާޅުވީ ޕީއެންސީގެ މެޖޯރިޓީ އޮތް މަޖިލީހަށް ސަޕްލިމެންޓަރީ ބަޖެޓު ހުށަހަޅައިގެން ކަންކަން އިސްލާހުކުރެވޭނެ ކަމަށާއި ބަޖެޓު އޮތް ގޮތުން ކަންކަންނުވީ ކަމަށް ވިދާޅުވުމަކީ ދެކޮޅުޖެހޭ ވާހަކައެއް ނޫން ކަމަށެވެ.

މީގެއިތުރުން މަސްވެރިންނަށް ފައިސާ ދޫކުރަން ފެށިކަން ސަރުކާރުން ހާމަކުރެއްވުމާއި ގުޅިގެން ވިދާޅުވީ އެއީ ވެސް ފުލެއް ނެތް ހައްލެއް ކަމަށެވެ.

އެގޮތުން މިފްކޯ، ފިނޭންސް މިނިސްޓްރީ އަދި ބީއެމްއެލް އިން ފައިސާ ހޯދާވާހަކަ އަށް ބަލާއިރު، މިފްކޯ އަކީ ބަނގުރޫޓުވެފައި އޮތް ތަނެއްކަން ރައީސް ޔާމީން ފާހަގަކުރެއްވިއެވެ. އަދި ފިނޭންސް މިނިސްޓްރީން އުޅެނީ އަންނަ މަހުގެ މުސާރަ ދެވޭނެ ގޮތެއް ނެތިގެންކަން ފާހަގަކުރެއްވިއެވެ.

ރައީސް ޔާމީން ވިދާޅުވީ މަސްވެރިންނަށް 48 ގަޑިއިރު ތެރޭ ފައިސާ ދޫކުރުމަކީ ބީއެމްއެލަށް ވެސް ކުރެވޭވަރުގެ ކަމަކަށް ނުވާނެ ކަމަށާއި ނަމަވެސް އެއީ ސަރުކާރު ހިއްސާވާ ކުންފުންޏަކަށްވާތީ، ވީވަރަކުން ސަރުކާރުން އެދޭ ކަންކަން ކޮށްދެނީ ކަމަށެވެ.