ޔުނިސެފްއާއި ލ. ގަމު ޕޮލިހާ ގުޅިގެން ގަމުގައި ބޭއްވި އާއިލީ ހަވީރުގައި އެމްއެންޑީއެފް ސެންޓްރަލް އޭރިއާ ކޮމާންޑުން ބައިވެރިވެއްޖެއެވެ.

ގަމު ތުނޑީ ކުޅޭބިމުގައި ޑިސެންބަރު 13 ވަނަ ދުވަހު ބޭއްވި އާއިލީ ހަވީރުގައި އެމްއެންޑީއެފް ސެންޓްރަލް އޭރިއާ ކޮމާންޑް، ފަޔަރ ކޮމްޕޯނަންޓް 3 އިން ސްޓޯލެއް ވަނީ ބަހައްޓާފައެވެ.

މި ސްޓޯލުން އެކި ކަހަލަ ހަރަކާތްތައް ކުރިއަށްގެންދިޔަ އިރު، އަލިފާންނިވި ބޭނުންކުރާނެ ގޮތާއި، އަލިފާން ނިއްވުމުގެ އެހެނިހެން ހުނަރުތައް ސްޓޯލަށް ޒިޔާރަތްކުރި ފަރާތްތަކަށް ވަނީ ކިޔައިދީފައެވެ. މީގެ އިތުރުން ފޮޓޯ ނެގުން ވެސް ވަނީ މި ސްޓޯލުން ކުރިއަށް ގެންގޮސްފައެވެ.

މި އާއިލީ ހަވީރުގައި 198 ކުދިން ބައިވެރިވި އިރު، މި ސްޓޯލަށް ގިނަ ބައެއްގެ ތަރުހީބު ލިބިފައިވެއެވެ.