ހައުސިންގ މިނިސްޓްރީ ހުރި އިމާރާތުގައި ހިނގި އަލިފާނުގެ ހާދިސާ ފުރިިހަމައަށް ތަހުގީގު ކުރުމަށް ރާއްޖެއިން ބޭރުގެ ތަހުގީގު ޓީމެއް ގެނައުމަށް ނިންމައިފިއެވެ.

މިކަން ހާމަކުރެއްވީ އެ ހާދިސާއާ ގުޅިގެން ބޭއްވި ނޫސްވެރިންގެ ބައްދަލުވުމުގައި ކޮމިޝަނަރ އޮފް ޕޮލިސް ޝުޖާއު އެވެ.

ސީޕީ ވިދާޅުވީ ކުރިއަށް އޮތް ދެތިން ދުވަހުގެތެރޭގައި އެ ޓީމަށް ދިވެހި ފުލުހުންގެ ތަހުގީގީ ޓީމާއެކު މަސައްކަތުގައި ބައިވެރިވެވޭނެ އިންތިޒާމް ހަމަޖެއްސުމަށް ސަރުކާރުގެ ތެރެއިން ކުރަން ޖެހޭ ކަންކަން ކުރަމުންދާ ކަމަށެވެ. އަދި މި ޓީމާއެކު ކުރެވޭ މަސައްކަތުން ހާދިސާ ހިނގައިދިޔަ ގޮތް ދެނެގަނެވޭނެކަމުގެ ޔަގީންކަން އެބައޮތް ކަމަށް ވިދާޅުވިއެވެ.

މި ޓީމު ގެނައުމުގެ އެންމެބޮޑު ބޭނުމަކީ މިހައިބޮޑު ހާދިސާއެއް ހިނގުމުން އެކަމުގެ ހަގީގަތް އެނގެން ރައްޔިތުންނަށް އޮޅުން ފިލުވައިދިނުން ކަމަށާއި ކުރިއަށް އޮތް ތަނުގައި މިފަދަ ހާދިސާތަކުން ރައްކާތެރިވުމަށްޓަކައި ކަމަށް ވެސް ސީޕީ ވިދާޅުވިއެވެ.

ސީޕީ ވިދާޅުވީ މި ހާދިސާއާ ގުޅިގެން އެންމެ ފުރަތަމަ މަންޒަރު ދުށްމީހުންގެ ބަޔާންތައް ނެގުމުގެ މަސައްކަތާއި ހާދިސާގެ މައުލުމާތު އެންމެ ފުރަތަމަ ލިބޭނެ ކަމަށް ގަބޫލުކުރެވޭ މީހުންނާ ސުވާލުކުރުމުގެ މަސައްކަތް ވެސް ކުރިއަށްދާކަމަށެވެ.

ހަމައެއާއެކު އެ ހާދިސާއާ ގުޅޭ އިތުރު މައުލޫމާތެއް ލިބިފައިވާނަމަ ހިއްސާ ކުރުމަށް ވެސް ސީޕީ ޝުޖާޢު ވަނީ އެދިވަޑައިގެންފައެވެ.