ރައީސް ޑރ. މުޙައްމަދު މުޢިއްޒުގެ ވައުދުފުޅާ އެއްގޮތަށް ގައުމީ އެއަރލައިން އަށް ވައިޑް ބޮޑީ މަތިންދާ ބޯޓު ގެނެސްފިއެވެ.

މި ބޯޓު ރާއްޖެ ގެނައީ ޖަނަވަރީ 6 ވަނަ ދުވަހު އެވެ. މިކަމަށްޓަކައި ހާއްސަ ރަސްމިއްޔާތެއް ބާއްވާފައިވާއިރު، ވެލާނާ އިންޓަރނޭޝަނަލް އެއަރޕޯޓް (ވީއައިއޭ) ގައި ބޯޓު ޖެއްސީ ހަވީރު 5:14 ގައެވެ. އަދި ވަނީ ވޯޓަރ ސެލިއުޓެއް ދީފައެވެ.

މިއީ 264 މީހުންގެ ޖާގައިގެ ބޯޓެކެވެ. އަދި ސަލާމަތާއި ރައްކާތެރިކަމުގެ ގޮތުން ވެސް ވަރުގަދަ ބޯޓެކެވެ. އެއަރބަސް އޭ330 ގެ 200 ވޭރިއަންޓުގެ މި ބޯޓުގައި ބިޒްނަސް ކްލާސް، ޕްރިމިއަމް ކްލާސް އަދި އިކޮނޮމީ ކްލާސް ހިމެނެއެވެ.

މި ބޯޓުގެ ދަތުރުތައް މި މަހުގެ 22 ވަނަ ދުވަހު ފެށުމަށް ނިންމާފައިވާއިރު، ފުރަތަމަ ދަތުރު ކުރާނީ ކޮން މަންޒިލަކަށްކަން އަދިހާމަކޮށްފައެއް ނުވެއެވެ. ނަމަވެސް ޗައިނާގެ 3 ސިޓީއަކުން ދަތުރުތައް ފަށާއިރު، ޔޫރަޕަށް ވެސް ދަތުރުކުރުމަށް ވަނީ ނިންމާފައެވެ.