ވައިޑް ބޮޑީގެ އިތުރު މަތިންދާ ބޯޓެއް ރާއްޖޭގައި މިއަހަރު އުދުހޭނެ ކަމުގައި ރައީސް ޑރ. މުޙައްމަދު މުޢިއްޒު ހާމަކުރައްވައިފިއެވެ.

އެ މަނިކުފާނު މިފަދައިން ހާމަކުރެއްވީ ވައިޑް-ބޮޑީ އެއަރކްރާފްޓް އޮޕަރޭޝަން އަދި އެއަރބަސް އޭ330-200، އިފްތިތާހުކުރުމަށް ބޭއްވި ހަފުލާގައި ވާހަކަފުޅުދައްކަވަމުންނެވެ.

ޖަނަވަރީ 6 ވަނަ ދުވަހު ހަވީރު ބޭއްވި މި ހަފުލާގައި އެމަނިކުފާނު ވިދާޅުވީ މި އޮޕަރޭޝަންތައް ފެށުމާއެކު، ގައުމީ އެއަރލައިން އިން ދަތުރުކުރާ މަންޒިލްތައް އިތުރުވުމުން ލިބޭ ކުރިއެރުމަކީ، ދިވެހި އިގްތިސާދު ފުޅާކުރުމަށް ފަށްޓަވާފައިވާ މަސައްކަތަށް ލިބޭ ވަރަށް ބޮޑު ކުރިއެރުމެއް ކަމަށެވެ.

އަޅުގަނޑުމެންގެ އުދުހުންތައް ދިވެހިންގެ އަތްމަތީގައި އޮތުމުގެ މުހިންމުކަމަށް އިޝާރާތްކުރައްވައި، ރައީސް ވަނީ މިގޮތުގައި ފަތުރުވެރިކަމާއި، އުދުހުމުގެ ސިނާއަތަށް ކުރިއެރުންތައް ލިބިގެންދާނެކަމަށެވެ. އަދި މިއަހަރު ވެގެންދާނީ، ކުޑަ ދުވަސްކޮޅެއްގެ ތެރޭގައި ވަރަށް ގިނަ ހަރުފަތްތަކެއް ގިރާކޮށްގެން، އައިލެންޑް އޭވިއޭޝަނާއި އެމް.އޭ.ސީ.އެލް އަށް އިތުރު ކުރިއެރުންތަކެއް ގެނެސްދޭނޭ އަހަރަކަށް ކަމުގައި ވެސް ވިދާޅުވިއެވެ.

"ކުރިއަށް އޮތީ ތަރައްގީގެ ދުވަސްތައް. މި އަހަރު ރައްޔިތުންނަށް ފެނިވަޑައިގަންނަވާނީ، އިގްތިސާދީ، އިޖުތިމާއީ، އަދި އުމްރާނީ ގޮތުން ވެސް ތަރައްގީގެ ޢަމަލީ މަންޒަރުތައް."

މީގެއިތުރުން މި ސަރުކާރުން މަސައްކަތްކުރަނީ ތަރައްގީ އާއި ހަމަޖެހުމާއި މިނިވަންކަމާއި ސިޔާދަތު އެކުއެކީގައި ހާސިލުވެގެންދާ ފަދަ ވަށާޖެހޭ ތަރައްގީއެއް ގައުމަށް ގެނެސްދެއްވުމަށްކަމަށް ވެސް ރައީސް ވިދާޅުވިއެވެ.

ރާއްޖޭގެ ފަތުރުވެރިކަން ކުރިއެރުވުމަށްޓަކައި، ފަތުރުވެރިން ގެނެވޭނެ މަންޒިލްތަކަށް ގައުމީ އެއަރލައިން "މޯލްޑިވިއަން" އިން ސީދާ ދަތުރުތައް ފެށުމަށްޓަކައި، "ވައިޑް-ބޮޑީ އެއަރކްރާފްޓް އޮޕަރޭޝަން" ތަރާރަފްކުރުމަށް ވަޒީރުންގެ މަޖިލީހުގެ ލަފާފުޅާއެކު ރައީސް ނިންމެވީ، 17 ޑިސެންބަރު 2023 ގައެވެ.

ރާއްޖެއަށް ވައިޑް-ބޮޑީ އެއަރކްރާފްޓް އޮޕަރޭޝަން ތައާރަފްކުރެއްވުމަކީ ރައީސްގެ ރިޔާސީ ކެމްޕެއިންގެ ވަޢުދުފުޅެކެވެ.