ގއ. ގެމަނަފުށީގެ ރައްޔިތުންނަށް ހާއްސަކޮށްގެން އެ ރަށުގައި "މޫދު ކަސްރަތު" ޕްރޮގްރާމް ހިންގައިފިއެވެ.

މިއީ އެމްއެންޑީއެފް ސަދަން އޭރިއާ ކޮމާންޑާއި ގއ. ގެމަނަފުށި ކައުންސިލުން ގުޅިގެން 2024 ޑިސެންބަރު 5 އިން 2025 ޖަނަވަރީ 5 ވަނަ ދުވަހުގެ ނިޔަލަށް ކުރިއަށްގެންދިޔަ ޕްރޮގްރާމެކެވެ.

މި ޕްރޮގްރާމްގައި އެ ރަށުގެ 22 ފިރިހެނުންނާއި 39 އަންހެނުން ހިމެނޭހެން 61 ފަރާތެއް ބައިވެރިވެ، ޕްރޮގްރާމް ފުރިހަމަ ކޮށްފައިވެއެވެ. މި ޕްރޮގްރާމްގައި ކުލާސްތައް ނަގައިދިނީ ސަދަން އޭރިއާ ކޮމާންޑް، ކާޑެއްދޫ ޕޯސްޓުގެ ސިފައިންނެވެ.

މި ޕްރޮގްރާމް ނިންމުމުގެ ގޮތުން ޖަނަވަރީ 5 ވަނަ ދުވަހުގެ ހަވީރު އެރަށު ގޮނޑުދޮށުގައި ބޭއްވި ރަސްމިއްޔާތު ޝަރަފުވެރިކޮށްދެއްވީ އެމްއެންޑީއެފް ސަދަން އޭރިއާ ކޮމާންޑުގެ ސާޖަންޓް މޭޖަރ، ސާޖަންޓް މޭޖަރ އިބްރާހީމް ރަޝީދެވެ.

މިއީ ރައްޔިތުންނަށް ބޭނުންވާ ދުޅަހެޔޮކަމާއި، ދުޅަހެޔޮ ސިއްހަތާއި، ރައްޔިތުން ބާރުވެރިކުރުމަށް ކުރިއަށްގެންދާ ޕްރޮގްރާމެކެވެ. އަދި އިޖުތިމާއީ ފޭރާން ވަރުގަދަކޮށް، އެއްބަޔަކު އަނެއް ބަޔަކަށް އިހްތިރާމްކުރާ، އެކުވެރިކަމާ އެކު ގުޅިގެން މަސައްކަތްކުރާ އެއްބައެއްވަންތަ މުޖުތަމައެއް ބިނާކުރުމަކީ މަގްސަދެކެވެ.

މި ޕްރޮގްރާމްގައި ބައިވެރިވި ފަރާތްތަކުގެ ތެރެއިން ރަންވަނަތައް ހާސިލުކުރި ފަރާތްތަކަށް ވަނީ ސެޓްފިކެޓާއި މެޑެލް ހަވާލުކޮށްފައެވެ.

މި ޕްރޮގްރާމްގައި ރައްޔިތުންނަށް ބޭނުންވާ ދުޅަހެޔޮ ސިއްހަތާއި ދުޅަހެޔޮ ސިއްހަތެއްގައި ހުރުމަށް ކަސްރަތު ކުރުމުގެ މުހިންމުކަމާއި، ކަސްރަތުން ލިއްބައިދޭ ފައިދާތައް ކިޔައިދިނެވެ. އަދި ކަސްރަތު ކުރަންވީ ރަނގަޅު ގޮތްތަކާއި ރަނގަޅު ސިއްހަތެއްގައި ހުރުމަށް ރަނގަޅު ކާނާ ކެއުމުގެ މުހިންމުކަމާ ބެހޭގޮތުން ވެސް ވަނީ މައުލޫމާތު ދީފައެވެ.

މީގެއިތުރުން އެއްބަޔަކު އަނެއްބަޔަކަށް އިހްތިރާމްކުރުމާއި ލީޑަރޝިފާއި ތަރުތީބުން ކަންކަން ކުރުމުގެ މުހިންމުކަމާއި އަދަބު އަޚްލާގާއި ރިވެތި އާދަކާދަތަކާއި ގަޑިއަށް ފަރުވާތެރިކަން ބެހެއްޓުމާއި އެކުވެރިކަމާއެކު ގުޅިގެން މަސައްކަތްކުރާ އެއްބައިވަންތަ ބައެއްގެ ގޮތުގައި މަސައްކަތްކުރާނެ ގޮތާއި އާދަތައް ވެސް ކިޔަދީފައިވެއެވެ.