ގދ. ނަޑެއްލާގައި އައު ބަނދަރެއް ހެދުމަށް ކޮންޓްރެކްޓަރެއް ހޯއްދަވަން މި ޖަނަވަރީ މަހު އިއުލާންކުރައްވާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ހުވަދުއަތޮޅުގެ ބައެއް ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން، ނަޑެއްލާގެ ރައްޔިތުންނާ މުހާތަބުކުރައްވައި ދެއްކެވި ވާހަކަފުޅުގައެވެ.

ރައީސް ވަނީ ނަޑެއްލާގައި މިހާރު ބޭނުންކުރަމުންދާ ބަނދަރަކީ، 2008 ވަނަ އަހަރު ތަރައްގީކޮށްފައިވާ ބަނދަރެއް ކަމަށާއި އެއީ ރަށަށް މިހާރު އައިސްފައިވާ ތަރައްގީއާ ނުބައްދަލު ބަނދަރެއް ކަމަށެވެ. އަދި އައު ބަނދަރުގެ މަސައްކަތް ކުރިއަށްގެންދަވާނީ، ރަށަށް ދިމާވެފައިވާ ރަށްގިރުމާއި އުދައެރުމުގެ މައްސަލައަށް، އެ މަޝްރޫއުގެ ތެރެއިން ހައްލެއް ގެނެވޭނޭ ގޮތަށް ކަމަށެވެ.

މީގެއިތުރުން އެރަށުގައި ޒަމާނާ އެކަށީގެންވާ ފެންވަރުގެ އައު މިސްކިތެއް ބިނާކުރުމުގެ މަސައްކަތާއި ސްކޫލާއި ސިއްހީ މަރުކަޒަށް ދިމާވެފައިވާ ޖާގައިގެ ދަތިކަން ހައްލުކުރުމުގެ މަސައްކަތްތައް ވެސް މިއަހަރު ކުރައްވާނޭކަމުގެ ޔަގީންކަން ދެއްވިއެވެ. އަދި ރަށުގެ ޒުވާނުންގެ ކަންބޮޑުވުންތައް ކަމުގައިވާ ފުޓުބޯޅަ ދަނޑާއި، ފުޓްސަލް ދަނޑާއި، ވޮލީ ދަނޑު އަދި ޒުވާނުންގެ މަރުކަޒުގެ މަސައްކަތް ވެސް މިއަހަރު ފެށޭނޭކަމަށް ވަނީ ވިދާޅުވެފައެވެ.

ރާއްޖޭގައި ފުލުހުންގެ ހިދުމަތް ނުލިބޭ ހަމައެކަނި ރަށެއްގެ ގޮތުގައި ނަޑެއްލާ އޮވެގެން ނުވާނޭކަން ފާހަގަކުރައްވައި، އެމަނިކުފާނުގެ ސިޔާސަތާ އެއްގޮތްވާ ގޮތުގެ މަތިން، ނަޑެއްލާގެވެސް އާބާދީގެ ނިސްބަތުން ބޭނުންވާ ފެންވަރަށް ހިދުމަތް ދިނުމަށް ގާއިމުވެ ތިބޭ ފުލުހުންގެ ހިދުމަތް ލިބޭނޭ އިންތިޒާމު ހަމަޖައްސަވާނޭކަން ރައީސް އިއުލާން ކުރެއްވިއެވެ.

އެމަނިކުފާނު ވަނީ ނަޑެއްލާގެ ކައުންސިލުން ފާހަގަކުރެއްވި ކަންބޮޑުވުންތަކަށް ހައްލު ހޯދުމަށް، ވަރަށް ފަރުވާތެރިކަމާއެކު ސަރުކާރުން މަސައްކަތްކޮށްދެއްވާނޭކަމުގެ ޔަގީންކަން ވެސް ދެއްވާފައެވެ. އަދި ރައްޔިތުންގެ ފަރާތުން އަބަދު ވެސް ލިބިވަޑައިގަންނަވާ އެއްބާރުލެއްވުން އެގޮތުގައި ދެއްވަމުން ގެންދެވުމަށް އެދިވަޑައިގެންނެވިއެވެ.