ގދ. ރަތަފަންދޫއަކީ ތައުލީމަށް ވަރަށް ބޮޑު އިސްކަމެއް ދެއްވާ ރައްޔިތެއް ދިރިއުޅުއްވާ ރަށެއް ކަމަށް ރައީސް ޑރ. މުޙައްމަދު މުޢިިއްޒު ވިދާޅުވެއްޖެއެވެ.

ހުވަދު އަތޮޅަށް ކުރައްވަމުން ގެންދަވާ ދަތުރުފުޅުގައި އެރަށު ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ ރަތަފަންދޫ ރައްޔިތުންނަކީ ވަރަށް ރަނގަޅަށް ކިޔަވާވިދާޅުވެގެން ތިއްބެވި ގައުމަށް ހިދުމަތް ކުރަމުންދާ އެތައް ދަރިންނެއް އުފައްދަވާފައިވާ ރަށެއް ކަމަށެވެ.

އެގޮތުން ސިއްހީ ދާއިރާގައި ވެސް ރަށަށް ނިސްބަތްވާ އެތައް ޑޮކްޓަރުން އުޅޭ ކަމަށާއި އެހެނިހެން ދާއިރާތަކުގައި ވެސް ކިޔަވައިގެން ތިއްބެވި ބޭފުޅުން ތިއްބެވި، ފަޚުރުވެރި އާއިލާތަކެއް ދިރިއުޅުއްވާ ރަށެއްކަން ފާހަގަކުރެއްވިއެވެ.

އެހެންކަމުން ރަށުގެ ތައުލީމަށާއި ރަށުގެ ދުޅަހެޔޮކަމަށާއި ރަށުގެ އިޖުތިމާއީ ހަމަޖެހުމަށް ސަމާލުކަން ދޭ މިންވަރު ހާމަވާކަމަށް ވިދާޅުވިއެވެ. އަދި އެރަށުގެ ކުރިއެރުމަށް ދޭންޖެހޭ ސަމާލުކަން ސަރުކާރުން ދެއްވާނެކަމުގައި ވެސް ވިދާޅުވިއެވެ.

ރައީސް އިތުރުން ރަށުގެ ތަރައްގީއަށް ބޭނުންވާ ކަންކަމުގައި ކުލަޖައްސައިދީ، އިރާދަކުރެއްވިއްޔާ އެކަމުގައި ނަތީޖާ ނެރެދެއްވުމަށް އެ މަނިކުފާނު ވައުދުވެވަޑައިގެންނެވިއެވެ.

މި ޖަލްސާއަށްފަހު ރައީސް ވަނީ ރަށުގެ ސިއްހީ މަރުކަޒާއި ކައުންސިލް އިދާރާއަށް ޒިޔާރަތްކުރައްވައި، އެތަންތަނުގެ ހާލަތު ވަޒަންކުރައްވާފައެވެ.