މާލެ ސިޓީކައުންސިލްގެ 2025 ވަނަ އަހަރުގެ ބަޖެޓް ފާސްކޮށްފިއެވެ.

މި ބަޖެޓް ފާސްކުރީ، މާލެ ސިޓީކައުންސިލްގެ 4 ވަނަ ދައުރުގެ 178 ވަނަ ރަސްމީ އާންމު ޖަލްސާގައެވެ. މި ޖަލްސާގައި 2025 ވަނަ އަހަރު މާލެ ސިޓީކައުންސިލަށް ލިބޭނެކަމަށް ލަފާކުރާ އާމްދަނީއާއި ހިނގާނެ ހަރަދުގެ ތަފުސީލު ޕްރަޒެންޓޭޝަނެއް ވެސް ވަނީ ހުށަހަޅާފައެވެ.

އެ ކައުންސިލުން އަހަރަށް ފާސްކުރި ބަޖެޓުގެ ޖުމުލައަކީ .50487،225،846 ރުފިޔާއެވެ.

ބަޖެޓު ހުށަހެޅުމަށް ފަހު، ބަޖެޓާބެހޭގޮތުން ވާހަކަ ދައްކަވަމުން، ޑެޕިއުޓީ މޭޔަރ އަޙުމަދު ނަރީޝް ދެއްކެވި ވާހަކަފުޅުގައި ވިދާޅުވީ އާންމުކޮށް މާލެ ސިޓީގައި ނުގެންގުޅޭ ބާވަތުގެ ވެހިލްތައް، މާލެސިޓީ ކައުންސިލުގައި އެބަހުރި ކަމަށެވެ. އަދި އެފަދަ ވެހިލްކަލްތަކުގެ ބޭނުން ހިފުމަށް ކުންފުނިތަކާއި އަމިއްލަ ފަރާތްކަން އެދެމުންދާކަމަށެވެ.

އެހެންކަމުން، އެ ފަދަ ވެހިލަކްތައް އިތުރަށް ހޯދައި، އެ ތަކެތި ކުއްޔަށް ދީގެން މާލެ ސިޓީ ކައުންސިލަށް ރަނގަޅު އާމްދަނީއެއް ލިބުމުގެ ފުރުސަތު އޮތްކަން ފާހަގަ ކުރެއްވިއެވެ.

ކައުންސިލަރ މުޙައްމަދު ސައިފު ފާތިޙު ވިދާޅުވީ ކޮންމެ އަހަރެއްގެ ދައުލަތުގެ ބަޖެޓުން މާލެސިޓީ ކައުންސިލަށް ދޭން، ގާނޫނުގައި ކަނޑައަޅުއްވާފައިވާ މިންވަރު ނުލިބޭކަމަށެވެ.

އޭނާ ވިދާޅުވީ 2024 ވަނަ އަހަރަށް ވުރެ ދައުލަތުގެ ބަޖެޓު އެތައް ތަނަކުން އިތުރުވި އިރު، ދައުލަތުގެ ބަޖެޓުން މާލެ ސިޓީ ކައުންސިލަށް ދޭން ނިންމި ފައިސާގެ އަދަދު، 2024 ވަނަ އަހަރަށް ވުރެ، 2025 ވަނަ އަހަރު، 23 މިލިޔަން ރުފިޔާ މަދު ކަމަށެވެ.