ނޭޝަނަލް ރިކޮމެންޑޭޝަންސް ޓްރެކިންގ ޑޭޓާބޭސް (އެން.އާރ.ޓީ.ޑީ) ތައާރަފުކުރުމަށް ބޭއްވި ވާރކްޝޮޕް ނިންމާލައިފިއެވެ.

މިއީ އ.ދ. ގެ އޮފީސް ފޮރ ދަ ހައިކޮމިޝަނަރ އޮން ހިއުމަން ރައިޓްސް (އޯ.އެޗް.ސީ.އެޗް.އާރ) އާއި ބަންޑާރަނައިބުގެ އޮފީހުން އިންތިޒާމްކޮށްގެން ބޭއްވި ވާރކްޝޮޕެކެވެ.

މި ޖަނަވަރީ މަހުގެ 14 އަދި 15 ގައި މި ވާރކްޝޮޕް ކުރިއަށްގެންދިޔައީ ދައުލަތުގެ އިދާރާތަކުގެ ފޯކަލް ޕޮއިންޓުންނަށް އަމާޒުކޮށްގެންނެވެ.

އެން.އާރ.ޓީ.ޑީ އަކީ، ގައުމުތަކުން ބައިވެރިވެފައިވާ އިންސާނީ ހައްގުތަކާބެހޭ ބައިނަލްއަގްވާމީ މުއާހަދާތަކުގެ ދަށުން، އ.ދ. ގެ ކަމާބެހޭ ކޮމިޓީތަކުން ގައުމުތަކަށް ހުށަހަޅާ ރިކޮމެންޑޭޝަންތައް ޓްރެކްކުރުމާއި، އެ ރިކޮމެންޑޭޝަންތައް ތަންފީޛުވަމުންދާ މިންވަރު ދެނެގަތުމަށްޓަކައި ގައުމުތަކަށް އެހީތެރިކަން ފޯރުކޮށްދިނުމުގެ ގޮތުން އ.ދ. އިން ތައާރަފުކޮށްފައިވާ ޑޭޓާބޭސްއެކެވެ.

އެގޮތުން މި ޑޭޓާބޭސް ރާއްޖޭގައި ރޯލް-އައުޓްކުރެވުމާއެކު، ރާއްޖެއިން ބައިވެރިވެފައިވާ އިންސާނީ ހައްގުތަކާބެހޭ ބައިނަލްއަގްވާމީ މުއާހަދާތަކުގެ ދަށުން ރާއްޖެއިން އަދާކުރަންޖެހޭ ޒިންމާތައް އަދާކުރުމާއި، ކުރެވެމުންދާ މަސައްކަތްތަކުގެ އަދާހަމަކުރުމަށް އިތުރަށް ފަސޭހަވެގެންދާނެއެވެ. އަދި މިއީ ނޭޝަނަލް މެކޭނިޒަމް ފޮރ އިމްޕްލިމެންޓޭޝަން، ރިޕޯޓިންގ އެންޑް ފޮލޯ-އަޕް (އެން.އެމް.އައި.އާރު.އެފް.) ގެ މައިގަނޑު އެއްބައިކަމުގައި ވެސް ވެގެންދާނެއެވެ.

އެން.އެމް.އައި.އާރު.އެފް ގެ ތެރެއިން ރިޕޯޓިންގ ގެ މަސައްކަތްތައް ކުރާ ދައުލަތުގެ 23 އިދާރާއަކުން 40 ބައިވެރިންނާއެކު ބޭއްވި މި ވާރކްޝޮޕްގެ މަގްސަދަކީ ރާއްޖެއިން ތަސްދީގުކޮށްފައިވާ އިންސާނީ ހައްގުތަކާބެހޭ ބައިނަލްއަގްވާމީ މުއާހަދާތަކުގެ ރާއްޖެއިން ކުރަންޖެހޭ ރިޕޯޓިންގގެ މަސައްކަތްތަކާއި، އ.ދ.ގެ ކޮމިޓީތަކުން ރާއްޖެއަށް ހުށަހަޅާފައިވާ ރިކޮމެންޑޭޝަންތައް ތަންފީޛުކުރުމުގެ މަސައްކަތްތައް ކުރިއަށްދާގޮތުގެ މައުލޫމާތު ޑޭޓާބޭސްގައި ހިމަނާނެގޮތާގުޅޭ މައުލޫމާތު ހިއްސާކުރުމެވެ.

މީގެއިތުރުން މި ޑޭޓާބޭސް ބޭނުންކުރާނެ ގޮތް އޮޅުފިލުވައިދީ، މި ވަރކްޝޮޕްގައި، އެން.އާރ.ޓީ.ޑީގެ އިންޓަރެކްޓިވް ޑިމޮންސްޓްރޭޝަންއަކާއި، އ.ދ.ގެ ކޮމިޓީތަކުން ހުށަހަޅާ ރިކޮމެންޑޭޝަންތައް މާނަކުރުމާގުޅޭގޮތުންނާއި، އެން.އާރ.ޓީ.ޑީގެ އެސް.އޯ.ޕީއާ ގުޅޭ މަޢުލޫމާތު ހިއްސާކުރެވިފައިވެއެވެ.