ލާމު ލިންކް ރޯޑުގެ ސަބަބުން ދެ ގައުމުގެ ދެމުދުގައި އޮތް ގުޅުން އިތުރުވެގެންދާނެ ކަމުގައި ޗައިނާގެ ސަފީރު މސ. ވަންގް ލީޝިން ވިދާޅުވެއްޖެއެވެ.

އެކަމަނާ މިފަދައިން ވިދާޅުވީ ލާމުގައި ކުރިއަށްދިޔަ "ލާމު މެރަތަން 2024" ޝަރަފުވެރިކޮށްދެއްވަން އެ އަތޮޅަށް ވަޑައިގެން "ދެން" އޮންލައިން އަށް ދެއްވި ބަސްދީގަތުމެއްގައެވެ.

ލިންކް ރޯޑްގެ މަޝްރޫއު އިފްތިތާހުކޮށްދެއްވީ މީގެ 10 އަހަރު ކުރިން ޗައިނާގެ ރައީސް, ޝީ ޖިންޕިން ރާއްޖެއަށް ކުރެއްވި ކާމިޔާބު ދަތުރުފުޅުގައޮކަން ވަނީ ފާހަގަކުރައްވާފައެވެ. އަދި އެގައުމުގެ ސަރުކާރުގެ އެހީގައި ކުރިއަށް ގެންދިޔަ އެ މަޝްރޫއުގެ މަސައްކަތް ކުރި އެ ގައުމުގެ ކުންފުނިން އެ މަޝްރޫއު ދެ އަހަރު ދުވަހުގެ ތެރޭގައި ނިންމާލިކަން ވެސް ފާހަގަކުރެއްވިއެވެ.

މީގެއިތުރުން ވޭދުވެދިޔަ 8 އަހަރަށް ވުރެ ގިނަ ދުވަސްތެރޭގައި އެ ލިންކް ރޯޑުން ފައިދާތަކެއް ވެގެންދިޔަ ކަމަށާއި އިގްތިސާދީ އަދި އިޖުތިމާއީ ތަރައްގީ ވަރަށް ބޮޑަށް ކުރިއަރައިގެން ގޮސްފައިވާ ކަމަށް ވިދާޅުވިއެވެ.

ލާމު ލިންކް ރޯޑުގެ ސަބަބުން ދެ ގައުމުގެ ދެމެދު އޮތް ގުޅުން އިތުރުވެގެންދާނެ ކަމަށް އުންމީދު ކުރައްވާ ކަމަށާއި ލިންކް ރޯޑްގެ ސަބަބުން ލާމުގެ ރައްޔިތުން ދުވުމަށް ޝައުގުވެރިކަން އުފެދިގެން ދިޔަ ކަމަށް ވެސް އެކަމަނާ ސަފީރު ވިދާޅުވިއެވެ.

އެ ލިންކް ރޯޑުން ހަތަރު ރަށް ގުޅުނުކަން ފާހަގަކުރައްވައި، އުންމީދަކީ އެގޮތަށް ދެ ގައުމުގެ ރައްޔިތުންގެ މެދުގައި ގުޅުން ބަދަހިވެގެން ދިއުން ކަމަށް ސަފީރު މސ. ވަންގް ލީޝިން ވިދާޅުވިއެވެ.

އެކަމަނާ އިތުރަށް ވިދާޅުވީ ލާމު ރަން 2024 އަކީ ރާއްޖޭގެ ރައީސް ޑރ. މުޙައްމަދު މުޢިއްޒު ޗައިނާ އަށް ކުރެއްވި ދަތުރުފުޅުގެ ސަބަބުން ހާސިލުވި ކަމެއްކަމުގައެވެ. މިއަހަރުގެ ދުވުމުގެ މެއިން ސްޕޮންސަރ އަކީ ޗައިނާގެ ޒިއަމެން ސްޕޯޓް އެވެ.