އިސްލާމީ ޝަރީއަތުގެ ހުރިހާ ތަނބުތައް އޮފުދާރުކޮށްދެނީ މަތިވެރި އަހްލާގާއި ރިވެތި ސިފަތަކުން ކަމުގައި ހުކުރު ހުތުބާގައި ހަނދާންކޮށްދީފިއެވެ.

ހުތުބާގައި ބުނީ އުންމަތެއް ހެޔޮ އުންމަތަކަށް ވަނީ އެއުންމަތުގެ އަހްލާގީ ފޭރާން ތާހިރުވެގެން ކަމަށާއި މަތިވެރި އަހްލާގަކީ އިސްލާމީ އަގީދާގެ އެންމެ މުހިއްމު އަސާސާއި އަޅުކަމުގެ ބިންގާ ކަމަށެވެ. އަދި އަޅުކަން ބިނާވެފައި ވަނީ އިބާދާތާއި މުއާމަލާތުގެ މައްޗަށް ކަމަށެވެ.

މީގެއިތުރުން އިބާދާތާއި މުއާމަލާތު ވަނީ ގުޅި ލާމެހިފައި ކަމަށާއި މާތްﷲ އަޅުކަން ކުރުމަށްފަހު، ދުނިޔަވީ ހަޔާތުގެ އެކި މުއާމަލާތްތައް ކުރުމަށް ބިމުގައި ފެތުރިގަތުމަށް މާތްﷲ އަންގަވާފައިވާކަން ވަނީ ހަނދާންކޮށްދީފައެވެ.

ހުތުބާގައި އިތުރަށް ބުނީ މުޖުތަމައުގައި ހިމެނޭ ގިންތިތަކުގެ ތެރެއިން މުވައްޒަފުންނަކީ އެންމެ މަތިވެރި ސުލޫކުން އެންމެ ފުރިހަމައަށް ޒީނަތްތެރިވާންޖެހޭ މީހުން ކަމަށެވެ. އަދި ވަޒީފާގެ މައިދާނުން ރިވެތި މާތް އަހްލާގީ ސިފަތައް ފެންނަންޖެހޭ ކަމަށެވެ.

"ކޮންމެ މުވައްޒަފަކީ އޭނާ ވާ ކޮންމެ ތަނެއްގައި އޭނާ ހެއްދެވި މަގްސަދު މަތިން ހަނދާންކޮށް އެމަގްސަދު ހާސިލުކުރުމަށް މަސައްކަތް ކުރަންޖެހޭނޭ މީހެކެވެ."

އިސްލާމީ ޝަރީއަތާއި ވަޟްޢީ ގާނޫނު ބުނެދޭ މަތިވެރި އަހްލާގެ އެންމެ ކުރީގައިވަނީ އަހުދަށް ރައްކާތެރިވުން ކަމަށާއި ހަވާލުކުރެވޭ ޒިންމާ ފުރިހަމައަށް އަދާކުރުމަށް ކަމުގައި ވެސް ހުތުބާގައި ހަނދާންކޮށްދީފައި ވެއެވެ.