ސަފާރީން ގެއްލުނު ދިވެހި މީހާގެ ހަށިގަނޑު ކަނޑުގެ 68 މީޓަރު އަޑިން ހޯދައިފިއެވެ.

އެމްއެންޑީއެފް އިން ވިދާޅުވީ ގެއްލުނު ދިވެހި މީހާގެ ހަށިގަނޑު އެމްއެންޑީއެފް މާލެ އޭރިއާ ކޮމާންޑް، ކޯސްޓްގާޑު ސެކަންޑް ސްކޮޑްރަންގެ ޑައިވަރުން ހޯދާފައިވާ ކަމަށެވެ. އަދި އޭނާގެ ހަށިޑަނޑު ހޯދީ ކަނޑުގެ 69 މީޓަރު އަޑިން ކަމަށެވެ.

އެ އިދާރާ އިން ވިދާޅުވީ ޑައިވަރުންގެ ޓީމުން، އެ މީހާގެ ހަށިގަނޑު ހީދައި، ލޯންޗަށް ނަގާފައިވަނީ މިއަދު ހަވީރު 3:35 ހާއިރު ކަމަށެވެ.

އދ. މިރިހި އައިލެންޑް ރިސޯޓް ކައިރީގައި އޮތް "ނޯތު 07" ނަމަކަށް ކިޔާ ސަފާރީން ވެއްޓިގެއްލުނީ ނ. ހޮޅުދޫ، ސީވީޑު، ޢަލީ އަރުޝަދުއެވެ. އެއީ އުމުރުން 35 އަހަރުގެ މީހެކެވެ.

ދިވެހި ފުލުހުންގެ ހިދުމަތުން ވިދާޅުވެފައިވަނީ އެ ސަފާރީގައި އުޅުނު ދިވެއްސަކު ގެއްލިގެން މިއަދު ހެނދުނު ރިޕޯޓުކޮށްފައިވާ ކަމަށެވެ. އަދި ރޭގެ ވަގުތެއްގައި ސަފާރީގެ ޑެކް މަތީ ހުއްޓާ އަރުޝަދު ވެއްޓި ސަފާރީގެ އަރިމަތީގައި ޖެހި މޫދަށް ވެއްޓޭ މަންޒަރު ސަފާރީގެ ސީސީޓީވީ ފުޓޭޖުން ފެނިފައިވާ ކަމަށެވެ.